Net Applications kompaniyasi 2016-yil avgusti yakunlariga ko‘ra jahon kompyuterlar uchun operatsion tizimlar bozoridagi vaziyat aks etgan hisobotni e’lon qildi. Bu haqda 3DNews xabar bermoqda.
Unga ko‘ra, Windows 10 o‘z pozitsiyalarini mustahkamlashda davom etmoqda: Microsoft’ning dasturiy platformasi global bozorning qariyb chorak qismini — 23 foizini egalladi. Bir yil oldin dasturning ko‘rsatkichi 5,2 foizga teng edi.
Shunga qaramay, hozircha Windows 10 eng ommabop dasturiy tizimdan — Windows 7 dan ancha ortda qolmoqda: uning bozordagi ulushi 47,3 foizga teng. Umuman olganda, eski dasturiy ta’minot pozitsiyalarini boy bermoqda: 2015-yil avgustida uning natijalari 57,7 foizga teng edi.
Uchinchi o‘rinda 9,4 foizlik natija bilan Windows XP turibdi. Bir yil muqaddam 15 yillik dasturiy tizimning bozordagi ulushi 12,1 foizga teng edi.
Umuman olganda, Windows’ning turli versiyalari bugun bozorning 90,5 foizini egallagan. Yana 7,4 foiz macOS’ga tegishli. Linux’ning turli variantlariga bozorning 2,1 foizlik ulushi tegishli.
Izoh (0)