Windows 10 компьютерлар учун операцион тизимлар бозорининг қарийб чорак қисмини эгаллади

Net Applications компанияси 2016 йил августи якунларига кўра жаҳон компьютерлар учун операцион тизимлар бозоридаги вазият акс этган ҳисоботни эълон қилди. Бу ҳақда 3DNews хабар бермоқда.

Унга кўра, Windows 10 ўз позицияларини мустаҳкамлашда давом этмоқда: Microsoft’нинг дастурий платформаси глобал бозорнинг қарийб чорак қисмини — 23 фоизини эгаллади. Бир йил олдин дастурнинг кўрсаткичи 5,2 фоизга тенг эди.

Шунга қарамай, ҳозирча Windows 10 энг оммабоп дастурий тизимдан — Windows 7 дан анча ортда қолмоқда: унинг бозордаги улуши 47,3 фоизга тенг. Умуман олганда, эски дастурий таъминот позицияларини бой бермоқда: 2015 йил августида унинг натижалари 57,7 фоизга тенг эди.

Учинчи ўринда 9,4 фоизлик натижа билан Windows XP турибди. Бир йил муқаддам 15 йиллик дастурий тизимнинг бозордаги улуши 12,1 фоизга тенг эди.

Умуман олганда, Windows’нинг турли версиялари бугун бозорнинг 90,5 фоизини эгаллаган. Яна 7,4 фоиз macOS’га тегишли. Linux’нинг турли вариантларига бозорнинг 2,1 фоизлик улуши тегишли.