Olimpiada o‘yinlari boshlanishiga 49 kun qolganida moliyaviy falokat tufayli Rio-de-Janeyroda favqulodda holat e’lon qilindi
Braziliyaning Rio-de-Janeyro shtati rasmiylari Rio–2016 Olimpiada o‘yinlari boshlanishiga 49 kun qolganida falokatli moliyaviy holatni e’lon qildi, deb xabar bermoqda “RBK”.
Rasmiylarning so‘zlariga ko‘ra, Olimpiada o‘yinlarini muvaffaqiyatli o‘tkazish uchun favqulodda choralar qo‘llash kerak bo‘ladi. Rio-de-Janeyro rahbariyati e’lon qilgan hujjatda, neft narxining tushib ketgani sababli 49 kundan keyin start oladigan Olimpiada o‘yinlariga qadar ular yuklatilgan vazifalarni bajara olmasligi mumkinligi ta’kidlangan.
Hujjatda qayd etilishicha, moliyaviy falokat xavfsizlik, sog‘liqni saqlash, ta’lim va atrof-muhit masalalarining inqiroziga olib keladi.
Rio-de-Janeyro shtati gubernatori Fransisku Dornelleshning so‘zlariga ko‘ra, moliyaviy holatni yaxshilash uchun jiddiy chora-tadbirlar qo‘llash kerak. Shu o‘rinda, Rio-de-Janeyro shahri hokimiyati jiddiy moliyaviy muammo yo‘qligini va shtat rahbariyatining bayonoti Olimpiada o‘yinlarining tayyorgarligiga ta’sir qilmasligi kerakligini ta’kidladi.
O‘tgan yilning oxiridan boshlab shtat hukumati nafaqa va maoshlarni kechiktirishga majbur bo‘lgan. Shuningdek, bir nechta shifoxona va o‘quv yurtlari yopilgan. Rio-de-Janeyroning budjet tanqisligi bu yil 5,56 milliard dollarga yetishi mumkin deb baholanmoqda.
