AQSh prezidentligiga nomzod, milliarder Donald Trampning fikricha, Apple korporatsiyasi Federal qidiruv byurosiga “San-Bernardino mergani”ning telefonini ochishda yordam berishi lozim edi. Bu haqda “Segodnya.ua” xabar bermoqda.
Foto: The Libertarian Republic
Ilgari xabar qilinganidek, 16-fevral kuni sudya Sheri Pim AQShning Apple korporatsiyasi Federal qidiruv byurosi xodimlariga San-Bernardinoda ommaviy qotilliklar uyushtirgan jinoyatchi Said Faruqning telefonini buzib, undagi ma’lumotlarni olishda yordam berishi lozimligi haqida qaror qabul qilgan edi.
Sud qaroriga muvofiq, korporatsiya shu paytga qadar terrorchining mobil uskunasi ma’lumotlariga buzib kira olmayotgan FQB xodimlariga maxsus dasturiy ta’minot taqdim etishi talab qilinadi.
Korporatsiya rahbari Tim Kuk, o‘z navbatida, sud qaroriga rasmiy e’tiroz bildirilishini ta’kidlab o‘tdi.
Ammo Donald Trampning fikricha, bu masalada Apple rahbariyati nohaq. Shu munosabat bilan u AQSh fuqarolariga kompaniya mahsulotlariga nisbatan boykot e’lon qilish taklifini berdi.
“Apple’ni ular tegishli axborotni taqdim etmaguniga qadar boykot qiling!”, – deb ta’kidladi siyosatchi Janubiy Karolina shtatidagi saylovoldi tadbirlaridan biridagi chiqishi chog‘ida.
