Medvedev neft-gaz daromadlarining byudjetdagi ulushi 70 dan 45 foizgacha tushib ketganini aytdi

Rossiya bosh vaziri Dmitriy Medvedev yaqin vaqtlargacha neft va gaz savdosidan tushgan daromad Rossiya byudjeti daromadlari umumiy summasining 70 foizini tashkil qilganini aytdi, deb yozadi Meduza.

“Yaqindagina bizda uglevodorodlardan tushgan daromad davlat byudjeti daromadlarining taxminan 70 foizini tashkil etardi. Ya’ni biz mana shu igna ustida o‘tirardik. Keyinroq 55 foizga, hozir esa 45 foizga tushdi”, — dedi Medvedev “Yagona Rossiya” partiyasi oliy va bosh kengashlariga nomzodlar bilan uchrashuvda.

Bosh vazir so‘zlariga ko‘ra, neftning narxi pasaygan davrda Rossiya iqtisodiyoti tuzilmasini o‘zgartirish zarur. Uning fikricha, past narxlar “umuman olganda, bizga xalal bermoqda”, ammo ular yana barreliga 140 dollargacha ko‘tarilsa, unda “yana hamma erkin nafas oladi”.