Jahonning eng baland osmono‘par binolari (foto)

Saudiya Arabistoni “Qirollik minorasi” (Kingdom Tower)ning qurilishini moliyalashtiradigan bo‘ldi, deya xabar bermoqda The Telegraph. Qurilishi yakuniga yetganidan so‘ng, u balandligi bir kilometrdan ortiq bo‘lgan jahondagi eng baland binoga aylanadi, deb yozadi “RIA Novosti”.

Kingdom Tower loyihasi, Saudiya Arabistoni

Jiddadan 32 kilometr shimolda bunyod etiladigan Kingdom Tower minorasi qurilishiga Saudiya Arabistoni hukumati 1,2 milliard dollar sarmoya kiritadi. Qurib bitkazilganidan so‘ng, u Dubaydagi “Burj Xalifa” minorasidan 200 metrga o‘zib, inson qo‘li bilan yaratilgan eng baland inshootga aylanadi.

Burj Xalifa, Dubay, BAA

Dubaydagi balandligi 828 metr bo‘lgan “Burj Xalifa” (“Xalifa minorasi”) hozirgi kunda jahondagi eng osmono‘par bino hisoblanadi. Qurilish ishlari davomida uning balandligi muntazam sir tutilgan — boshqa birov bundan-da baland bino qurib qo‘ymasligi uchun.

Osmono‘par binolar, Shanxay, Xitoy

Balandligi bo‘yicha “Burj Xalifa”dan keyingi o‘rinni Shanxayning Lujiazui biznes-tumanida joylashgan Shanghai Tower osmono‘par binosi egallagan. 632 metrlik binoning tashqi tomoni bitgan, ichkarida esa qurilish ishlari davom etmoqda. Ochilishi 2015-yil oxiriga rejalashtirilgan.

Abraj al-Bayt binolar majmuasi, Makka, Saudiya Arabistoni

Abraj al-Bayt — Makkadagi baland binolar majmuasi. U og‘irligi bo‘yicha jahondagi eng katta bino, balandligi bo‘yicha esa “Burj Xalifa” va Shanxay minorasidan keyin uchinchi o‘rinda turadi. Abraj al-Baytning balandligi 601 metrga teng.

Pinan xalqaro moliya markazi, Xitoy

Xitoyning Guandun viloyati, Shenchjen shahrida balandligi 600 metr, 115 qavatdan iborat inshootni ham o‘z ichiga olgan binolar majmuasi — Pinan xalqaro moliya markazi qurilmoqda.

Jahon savdo markazi, Nyu-York, AQSh

Jahon savdo markazi-1 yoki Ozodlik minorasi — quyi Manxettenda qurilayotgan yangi Jahon savdo markazi majmuasining markaziy inshooti hisoblanadi. U balandligi bo‘yicha G‘arbiy yarimshardagi eng baland, jahon bo‘yicha esa to‘rtinchi bino hisoblanadi. Qurilishi 2013-yil 10-may kuni yakuniga yetgan minoraning balandligi 541 metrga teng.

Taybey 101, Tayvan

Taybey 101 — Tayvan poytaxtida joylashgan, 101 qavatdan iborat, balandligi 509,2 metr bo‘lgan bu binoda jahondagi eng tez liftlar ishlaydi — beshinchi qavatdan tomosha maydonchasi joylashgan 89-qavatga atigi 39 soniyada chiqish mumkin.

Xalqaro tijorat markazi, Gongkong

Gongkong shahrining Koulun tumani g‘arbiy qismida 2010-yili 118 qavatdan iborat, balandligi 484 metr bo‘lgan Xalqaro tijorat markazi qurilgan edi.

Petronas minoralari, Kuala-Lumpur, Malayziya

Petronas minoralari — Malayziya poytaxti Kuala-Lumpurdagi balandiligi 451,9 metr, 88 qavatdan iborat egizak osmono‘par binolardir.