Toshkentda to‘qimachilik “Texnoparki” quriladi
Toshkentda 2017-yilgacha o‘quv-tadqiqot to‘qimachilik “Texnoparki” quriladi. “Gazeta.uz” xabariga ko‘ra, loyiha “O‘zbekyengilsanoat” kompaniyasi tomonidan Janubiy Koreya Savdo, sanoat va energetika vazirligi bilan hamkorlikda amalga oshiriladi.
Xabar berishlaricha, texnoparkda Toshkent to‘qimachilik va yengil sanoat instituti uchun o‘quv va tadqiqot dasturlari ishlab chiqiladi, yuqori qo‘shimcha qiymatli mahsulotlar (tayyor matolar, tikuv-trikotaj buyumlari)ni ishlab chiqarish sohasidagi mutaxassislar o‘qitiladi, to‘qimachilik yo‘nalishidagi nou-xaular o‘rganiladi va tadqiqot ishlari olib boriladi.
Rejaga ko‘ra, loyiha Janubiy Koreya hukumatining “Taraqqiyotga rasmiy yordam” dasturi grant mablag‘lari hisobidan moliyalashtiriladi, grant mablag‘lari qurilish-montaj ishlari, uskunalarni sotib olish va o‘rnatish, shuningdek, xodimlarni o‘qitish uchun yo‘naltiriladi. Texnoparkning qoralama rejasi Janubiy Koreya mutaxassislari tomonidan ishlab chiqilgan.
Reja bo‘yicha, texnoparkning uch qavatli korpuslaridagi 4000 kvadrat metr maydonda o‘quv xonalari, anjuman zallari, ko‘rgazma maydonchalari, laboratoriyalar, ofislar, oranjereya va boshqa obyektlar joylashadi. Ikki qavatli binoda esa umumiy maydoni 1500 kvadrat metrdan ortiq bo‘lgan ilmiy-tajbira laboratoriyasi faoliyat olib boradi.
Texnoparkdagi besh qavatli binolarning tomlariga esa oranjereya va maysali qoplamasi bor bog‘larni joylashtirish ko‘zda tutilgan. Bino zamonaviy konstruksiyalardan qurilishi rejalashtirilgan. Yondosh hududlar yuqori chidamli bezakdor plitalar bilan qoplanadi hamda yashil hudud va favvoralar bilan bezatiladi.
