O‘zbekiston Milliy olimpiya qo‘mitasi huzuridagi Respublika sport tibbiyoti ilmiy-amaliy markazi (fotogalereya)
O‘zbekiston Milliy olimpiya qo‘mitasi matbuot xizmati Respublika sport tibbiyoti ilmiy-amaliy markazining fotogalereyasini taqdim etdi.
O‘zbekiston Milliy olimpiya qo‘mitasi binosida joylashgan ushbu sport tibbiyoti markazi 5 bo‘limdan iborat bo‘lib, bu yerda 585 turdagi eng zamonaviy tibbiy maxsus asbob-uskunalar o‘rnatilgan.
Shu o‘rinda alohida ta’kidlab o‘tish joizki, bunday tibbiy-biologik markazlar dunyoning sanoqli davlatlaridagina mavjud.
Respublika sport tibbiyoti ilmiy-amaliy markazida nafaqat o‘zbekistonlik, balki xorijdan taklif etilgan yetakchi shifokorlar ham faoliyat olib boradi. Markazda sportchilar va sport jamoalariga, shuningdek, respublika aholisiga, xorijiy fuqarolarga diagnostika va davolash sifatining tasdiqlangan standartlariga rioya qilish sharti bilan ambulator tibbiy yordamning barcha turlarini, shu jumladan diagnostik va laboratoriya tadqiqotlari o‘tkazish bo‘yicha xizmat ko‘rsatiladi.
Respublika sport tibbiyoti ilmiy amaliy-markazi rasman faoliyatini boshlagandan so‘ng, o‘tgan qisqa vaqt ichida bu yerga Xalqaro olimpiya qo‘mitasi prezidenti Tomas Bax, Milliy olimpiya qo‘mitalari assotsiatsiyasi rahbari, Osiyo olimpiya kengashi prezidenti Shayx Ahmad al-Fahad al-Saboh, shuningdek, sportning qator turlari bo‘yicha xalqaro sport federatsiyalarining rahbarlari tashrif buyurib, bu yerda yaratilgan sharoitlarga yuqori baho berdi.
Respublika sport tibbiyoti ilmiy-amaliy markazida boshqa sport tibbiyoti markazlaridan farqli ravishda, bu yerda sportchilarga barcha tekshirishlar, jumladan, nurli tashhis, kompyuter tomografiyasi, magnit rezonans tomografiyasi (MRT) tekshiruvlaridan o‘tish, zarur dori-darmon va zamonaviy bog‘lov materiallarini xarid qilish imkoniyatlari yaratilgan.
