Kvanju shahrida davom etayotgan navbatdagi yozgi Universiada o‘yinlarining 10-kunida o‘zbekistonlik taekvondochi, jahon chempioni Dmitriy Shokin talabalar o‘rtasida ham dunyoda tengsiz ekanligini namoyish etdi. “Sports.uz” sayti ushbu sportchi bilan bog‘lanib, uning taassurotlari haqida suhbatlashdi.
– Salom, Dmitriy. Avvalambor, qo‘lga kiritgan navbatdagi chempionligingiz bilan tabriklayman. Terma jamoamiz tarkibida ilk medal egasi bo‘lib turgan sportchi sifatida taassurotlaringiz qanday?– Rahmat, barchasi a’lo darajada. Dastavval, meni qo‘llab turgan, ishongan barcha-barchaga: yaqinlarimga, do‘stlarimga, yurtdoshlarimizga, qolaversa, ustozim Fahriddin aka Umarovga katta minnatdorchilik bildirib qolaman. Ularning daldalari menga katta kuch berib turdi. Qolgan sport turi bo‘yicha yurtimiz sharafini himoya qilgan vakillarimizning shohsupaga ko‘tarila olishmagani alamli. Ularning kelajakdagi faoliyatlarida omad tilab qolaman.
– Bellashuvlar oldidan qanday kechinmalar o‘tdi?– Jangga tushishdan oldin barchaning umidi mendan ekanligini uchun yelkamda katta mas’uliyat borligini his etib turardim. Hech bir g‘alaba osonlikcha qo‘lga kiritilmaydi. Finaldagi raqibim bo‘y va vazn borasida katta ustunlikka ega edi: uzunligi 2 metrdan, shaxsiy vazni 100 kilogrammdan ziyod edi. Biroq barchasini to‘g‘ri baholay olib, so‘nggi raundda qimmatli ochkolarni ishlashga muvaffaq bo‘ldim.
– Bu musobaqa siz uchun nimasi bilan ahamiyatli edi?– Yozgi Universiada o‘yinlarida ilk bor qatnashishim. Bu turnir ham Rio Olimpiadasiga 20 reyting ochkosini taqdim etardi. Olimpiada o‘yinlariga litsenziya ochkolarini beradigan musobaqalar, tabiiyki, katta va jiddiy e’tiborni talab etadi.
– Oldinda sizni qanday musobaqalar kutib turibdi?– Endigi navbat “Koreya open” musobaqasiga. Bu turnirda ham kelasi yili Rio-de-Janeyro shahrida bo‘lib o‘tadigan yozgi Olimpiya o‘yinlariga yo‘llanma beruvchi reyting ochkolari o‘ynaladi. Ertadan boshlab barcha e’tibor ushbu turnirga qaratiladi.
Izoh (0)