Estrada san’atida o‘z o‘rniga ega bo‘lib borayotgan xushovoz xonanda Bahrom Nazarov viloyatlarda bo‘lib o‘tajak konsert dasturlaridan oldin jurnalistlarni bir joyga jamladi, deb xabar bermoqda “12news.uz”.
GRAND ORZU mehmonxonasida bo‘lib o‘tgan matbuot anjumanida xonanda OAV vakillarining qulay va noqulay savollari girdobida qoldi. Undan nega ustozi Ozodbek Nazarbekov haqida ko‘p gapirishi, kimlarni o‘ziga raqobatchi deb bilishi, tanqidlarga munosabati, shaxsiy hayot tarzi, xorij estradasiga munosabati haqida so‘rashdi.
Hattoki 1-2 oydan beri xonandaning boshida paydo bo‘lgan shlyapa ham nazardan chetda qolmadi. Jurnalistlardan biri xonandaga shlyapa o‘rniga do‘ppi kiyib yurishni tavsiya qildi.
Xonanda o‘z konsert dasturlari haqida yaqinda prodyusseridan eshitganligini, konsert dasturlarining biletlari narxini bilmasligini ta’kidladi.
Eslatib o‘tamiz, 28-apreldan 27-iyunga qadar respublikaning barcha viloyatlari va Qoraqalpog‘iston Respublikasida iste’dodli xonanda Bahrom Nazarovning gastrol safarlari bo‘lib o‘tadi. Konsert dasturlari tashkilotchisi MO‘JIZA MEDIA kompaniyasi prodyusseri Davron Soipovning fikriga ko‘ra, bu dasturlar kelgusida Toshkent shahrida bo‘lib o‘tishi rejalashtirilayotgan konsert dasturi oldidagi sinovdir. Xonanda bu dasturlar orqali o‘z muxlislariga bir qator yangi qo‘shiqlarini ham taqdim etadi.
Izoh (0)