Хонанда Баҳром Назаровга шляпа ўрнига дўппи кийишни тавсия қилишди

Эстрада санъатида ўз ўрнига эга бўлиб бораётган хушовоз хонанда Баҳром Назаров вилоятларда бўлиб ўтажак концерт дастурларидан олдин журналистларни бир жойга жамлади, деб хабар бермоқда «12news.uz».

GRAND ORZU меҳмонхонасида бўлиб ўтган матбуот анжуманида хонанда ОАВ вакилларининг қулай ва ноқулай саволлари гирдобида қолди. Ундан нега устози Озодбек Назарбеков ҳақида кўп гапириши, кимларни ўзига рақобатчи деб билиши, танқидларга муносабати, шахсий ҳаёт тарзи, хориж эстрадасига муносабати ҳақида сўрашди.

Ҳаттоки 1-2 ойдан бери хонанданинг бошида пайдо бўлган шляпа ҳам назардан четда қолмади. Журналистлардан бири хонандага шляпа ўрнига дўппи кийиб юришни тавсия қилди.

Хонанда ўз концерт дастурлари ҳақида яқинда продюссеридан эшитганлигини, концерт дастурларининг билетлари нархини билмаслигини таъкидлади.

Эслатиб ўтамиз, 28 апрелдан 27 июнга қадар республиканинг барча вилоятлари ва Қорақалпоғистон Республикасида истеъдодли хонанда Баҳром Назаровнинг гастрол сафарлари бўлиб ўтади. Концерт дастурлари ташкилотчиси MO‘JIZA MEDIA компанияси продюссери Даврон Соиповнинг фикрига кўра, бу дастурлар келгусида Тошкент шаҳрида бўлиб ўтиши режалаштирилаётган концерт дастури олдидаги синовдир. Хонанда бу дастурлар орқали ўз мухлисларига бир қатор янги қўшиқларини ҳам тақдим этади.