Joriy yilning 19-yanvar kuni “Chet tillar o‘qituvchilarining bazaviy lavozim maoshlariga oylik ustama belgilash uchun test sinovlarini o‘tkazish tartibi to‘g‘risidagi nizomga o‘zgartirish va qo‘shimchalar kiritish haqida” O‘zbekiston Respublikasi Vazirlar Mahkamasi huzuridagi davlat test markazi tomonidan buyrug‘ qabul qilindi, deb xabar bermoqda UzReport.

Foto: UzReport

Foto: UzReport

Unga ko‘ra, Chet tillar o‘qituvchilarining bazaviy lavozim maoshlariga oylik ustama belgilash uchun test sinovlarini o‘tkazish tartibi to‘g‘risidagi nizomga ilovaga muvofiq o‘zgartirish va qo‘shimchalar kiritildi. Davlat test markazi tomonidan beriladigan Chet tilini bilish darajasi to‘g‘risidagi malaka sertifikati bo‘yicha C1 darajasiga, IELTS sertifikati bo‘yicha 7,0 ball va undan yuqori ballga, TOEFL sertifikati bo‘yicha 110 ball va undan yuqori ballga va shuningdek, DALF, DELE sertifikatlari bo‘yicha C1 darajasiga ega bo‘lgan o‘qituvchilar mazkur hujjatlarning amal qilish muddati davomida test sinovidan o‘tishlari talab etilmaydi.

Test sinovlarini tinglab tushunish, o‘qish, leksik va grammatik kompetensiyalar bo‘limlarining har biridan belgilangan maksimal ballning kamida 40 foizini, gapirish va yozish bo‘limlarining har biridan belgilangan maksimal ballning kamida 50 foizini to‘plagan o‘qituvchilar test sinovlaridan muvaffaqiyatli o‘tgan deb hisoblanadi. Eslatib o‘tamiz, mazkur o‘zgartirish va qo‘shimchalar O'zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, O‘rta maxsus, kasb-hunar ta’lim markazi, Moliya vazirligi, Iqtisodiyot vazirligi hamda Mehnat va aholini ijtimoiy muhofaza qilish vazirligi bilan kelishilgan holda qabul qilindi.