Avstraliya ommaviy axborot vositalarida Osiyo kubogi−2015 musobaqasining guruh bosqich o‘yinlari batafsil muhokama qilinmoqda. Bu haqda “Uff.uz” xabar berdi.
Sekin-asta guruhdagi yetakchi jamoalar birma-bir tilga olinyapti. Mahalliy futbol mutaxassislari va jurnalistlari ayni paytda Avstraliya termasini tanqid ostiga olishgan. Bunga sabab − 3-turdagi mag‘lubiyat.
Endi bor e’tiborni chorak finalga qaratish kerakligi aytilmoqda. Gap shundaki, pley-off bosqichida Avstraliya terma jamoasi O‘zbekistonga qarshi o‘ynashni istagan ekan. Ular O‘zbekistonni nisbatan osonroq raqib qatoriga qo‘shishgan. Xitoyni esa, judayam kuchli terma sifatida baholashmoqda va ularga qarshi bo‘ladigan o‘yindan xavfsirashmoqda.
Mahalliy FOX Sport telekanali “B” guruhi haqida ma’lumotlar berar ekan, ikkinchi o‘rinni qayd etgan O‘zbekiston termasiga bag‘ishlab maxsus videorolikni ham havola etdi. Unda Qosimovning Saudiya Arabistoniga qarshi o‘yin oldidan va keyingi fikrlari bayon qilindi. Avstraliya termasi O‘zbekistonga qarshi o‘ynash nisbatan yengil kechishi mumkin edi, degan g‘oyani ilgari surmoqda. Ular Xitoyga ro‘baro‘ kelganliklaridan xavotirga tushishgan.
Endi, Janubiy Koreya lageriga nigoh solib ko‘rsak. Chorak finaldagi raqibimiz ertaga Melburndagi Lakeside Stadium o‘yingohida mashg‘ulotlarni olib boradi. Terma jamoa albatta, yarim finalga chiqish vazifasini olgan. Janubiy koreyalik jurnalistlarning ta’kidlashlaricha, terma jamoa murabbiylar shtabi O‘zbekistonga qarshi JCh−2014 saralashidagi o‘yinlarni eslashgan.
O‘zbekistonning Janubiy Koreyada alami borligi ham aytib o‘tilgan. Ma’lum ma’noda koreyslar O‘zbekistondan biroz hadiksirab turishganini ham bildik. Balki bu o‘yin oldidan o‘ziga xos taktika bo‘lishi ham mumkin, ammo Janubiy Koreya termasi juda kuchli raqibga duch keldik, qabilida tayyorgarlik ko‘rmoqda.
O‘zbekiston terma jamoasi mashg‘ulotlarni ertaga SS Anderson Oval stadionida olib boradi. Bu haqida keyinroq batafsil ma’lumot beramiz.
Izoh (0)