O‘zbekiston Respublikasi Oliy sudida “Sudlar faoliyatida axborot-kommunikatsiya texnologiyalaridan samarali foydalanish masalalari” mavzusida xalqaro seminar bo‘lib o‘tdi. Bu haqda O‘zbekiston Milliy axborot agentligi xabar bermoqda.
O‘zbekiston Respublikasi Oliy sudi va Oliy xo‘jalik sudi tomonidan BMT Taraqqiyot dasturi, Germaniya xalqaro hamkorlik jamiyatining O‘zbekistondagi vakolatxonalari, shuningdek, Yevropa Kengashining Venetsiya komissiyasi bilan hamkorlikda tashkil etilgan tadbirda Koreya Respublikasi, Sloveniya, Bolgariya, Maltadan xalqaro ekspertlar, O‘zbekiston Oliy sudi va Oliy xo‘jalik sudi, Adliya vazirligi, Aloqa, axborotlashtirish va telekommunikatsiya texnologiyalari davlat qo‘mitasi vakillari, huquq sohasi olim va mutaxassislari ishtirok etdi.
Seminar ishtirokchilari Prezident Islom Karimov rahnamoligida demokratik islohotlarni yanada chuqurlashtirish, fuqarolik jamiyatini rivojlantirish maqsadida amalga oshirilayotgan izchil islohotlar yuksak samaralar berayotganini ta’kidladi.
“BMT Taraqqiyot dasturi O‘zbekiston bilan ko‘plab yo‘nalishlarda, jumladan, sud-huquq sohasida ham samarali hamkorlik qilmoqda, — dedi BMTning O‘zbekistondagi doimiy muvofiqlashtiruvchisi, BMT Taraqqiyot dasturining doimiy vakili Stefan Prisner. — O‘zbekiston Oliy sudi bilan hamkorlikda sud faoliyatiga axborot-kommunikatsiya texnologiyalarini joriy etish bo‘yicha amalga oshirilayotgan loyiha yaxshi samara bermoqda”.
Xalqaro ekspertlar O‘zbekistonda davlat boshqaruvi tizimiga axborot-kommunikatsiya texnologiyalarini keng joriy etish, “elektron hukumat” va elektron hujjat aylanishini rivojlantirishga qaratilgan me’yoriy-huquqiy bazani yuksak baholadi. Sohada o‘zlashtirilayotgan ilg‘or texnologiyalar sudlar faoliyatini to‘liq axborotlashtirish va sud ishini elektronlashtirishni kengaytirish imkonini berayotgani ta’kidlandi.
“O‘zbekiston sud-huquq tizimida amalga oshirilayotgan islohotlar bilan tanishdik, — dedi Koreya Respublikasi Oliy sudi sudyasi Yom Xojun. — Mamlakatingizda sudlar faoliyatiga axborot-kommunikatsiya texnologiyalarini joriy qilishni kengaytirish bo‘yicha ko‘rilayotgan izchil chora-tadbirlar e’tiborga molikdir”.
Ekspertlar O‘zbekiston xo‘jalik sudlari faoliyatiga zamonaviy axborot-kommunikatsiya texnologiyalarini samarali joriy qilish bo‘yicha amalga oshirilgan ishlarga yuqori baho berdi. Ushbu sudlarda 2013-yilning 1-sentabridan da’vo arizalari va iltimosnomalarni elektron shaklda qabul qilish tartibi joriy etilgan. Bundan tashqari, tadbirkorlik subyektlari o‘z xohishiga ko‘ra, Oliy xo‘jalik sudi veb-sayti orqali istagan xo‘jalik sudiga nafaqat da’vo arizasi va iltimosnoma, balki apellyatsiya va kassatsiya shikoyatlari, nazorat tartibida e’tiroz kiritish haqidagi ariza bilan ham murojaat qilmoqda.
2014-yil 1-sentabridan xo‘jalik sudlarida sud majlislarini videokonferensaloqa rejimida o‘tkazish tartibi yo‘lga qo‘yildi. Bunday tizim tadbirkorlik subyektlariga o‘zlari joylashgan hududdagi xo‘jalik sudi binosida turib, boshqa hududda bo‘layotgan sud majlisida videokonferensaloqa orqali ishtirok etish imkonini bermoqda.
Seminar qatnashchilari sudlar faoliyatiga axborot-kommunikatsiya texnologiyalari joriy etilishi oshkora va odil sudlovni ta’minlash, sudlarda hujjat aylanish samaradorligi va tezkorligini oshirish, jamiyatda huquqiy bilimlar targ‘ibotini kuchaytirishga xizmat qilishini alohida ta’kidladi.
Anjumanda sudlar faoliyatida axborot-kommunikatsiya texnologiyalaridan foydalanish bo‘yicha xalqaro tajriba va milliy amaliyot, sudlarda axborot texnologiyalarini joriy etish tendensiyalari, sud ishini elektron uslubda yuritish, sudlar faoliyatiga axborot-kommunikatsiya texnologiyalarini joriy etishda axborot xavfsizligi masalalari va boshqa dolzarb mavzularga bag‘ishlangan ma’ruzalar tinglandi.
Xalqaro seminar ishtirokchilari O‘zbekiston Respublikasi Oliy sudi va BMT Taraqqiyot dasturining O‘zbekistondagi vakolatxonasining “Fuqarolik sudlovini takomillashtirish: samarali sud boshqaruvi” qo‘shma loyihasini amalga oshirish natijalari bilan tanishdi. Ular fuqarolik ishlari bo‘yicha Zangiota tumanlararo sudida bo‘lib, “E-SUD” sud ishini elektron uslubda yuritish tizimining taqdimot marosimida ishtirok etdi.
“Sudlar faoliyatiga zamonaviy axborot-kommunikatsiya texnologiyalarining tatbiq etilishi sudlov ishlari jarayonini tezlashtirish imkonini beradi, — dedi axborot-kommunikatsiya texnologiyalari masalasi bo‘yicha mustaqil ekspert Adrian Avellino (Malta). — ‘E-SUD’ sud ishini elektron uslubda yuritish tizimi loyihasi menda katta taassurot qoldirdi. Bu tizim juda samarali va ravon ishlashiga guvoh bo‘ldik. ‘E-SUD’ O‘zbekistonda sud tizimini yanada rivojlantirishga salmoqli hissa qo‘shishiga aminmiz”.
Xalqaro seminar qatnashchilari sudlar faoliyatiga axborot-kommunikatsiya texnologiyalarini joriy etish mexanizmlarini yanada takomillashtirishga oid taklif va tavsiyalar ishlab chiqdi.
Izoh (0)