Birlashgan Arab Amirliklaridagi “Al Ittihod” zamonaviy san’at galereyasi sohiblari tirannozavr skeletlarini sotuvga qo‘ydi. Skeletlar narxi 14 million dollar, deya xabar bermoqda “TASS”.
Yangi bo‘r davriga tegishli yirtqichlar skeleti 1988-yil AQSh hududida topilgan bo‘lib, BAAga 12 yil avval ko‘chirib o‘tilgan. “Bu skelet dinozavrlar ichida haqiqiy olmos – Tinker (tironnazavr qizga qo‘yilgan ism) dunyoda topilgan yagona yosh qizcha, qolgan skeletlarning hammasi voyaga yetgan dinozavrlarga tegishlidir. Uning uzunligi 7,5 metrni tashkil etadi”, — dedi galereya rahbari Holid Siddiq.
Paleontolog olimlar ikkinchi skelet Tinkerning onasi – Reginaga tegishli ekanligini aniqladi. Unga yirtqichlar yonidan topilgan, taxmin qilinishicha o‘ljaga aylangan o‘txo‘r gadrozavr skeleti ham qo‘shib sotiladi.
Nashriyot jurnalistlari bilan bo‘lgan suhbatda galereyaning ijrochi direktori Shaxdod Jahonboni 65 million yil birga bo‘lgan ona-bolani bir-biridan ajratmoqchi emasligini, qolaversa, bu taklif muzeylar uchun foydaliroq ekanligni ta’kidladi.
Skeletlar umumiy narxi 14 million dollarni tashkil etadi, shulardan 10 millioni Tinker uchun, atigi 4 millioni Regina uchun so‘ralmoqda. Holid Siddiq ikkinchi skelet yaxshi saqlanmagani, faqat 40 foizi haqiqiy suyaklardan iborat bo‘lgani uchun arzonroq ekanligini qayd etdi.
Amirlik davlat muassasa va kompaniyalari potensial xaridor sifatida qaralmoqda. Birlashgan Arab Amirliklarida dinozavrlar skeletiga talab katta. Shunday skeletlardan biri jahonga mashhur supermarket bo‘lmish Dubai Mall'da, ikinchisi esa Abu Dabi Xalqaro aeroportida turadi.
Izoh (0)