Бирлашган Араб Амирликларидаги «Ал Иттиҳод» замонавий санъат  галереяси соҳиблари тираннозавр скелетларини сотувга қўйди. Скелетлар нархи 14 миллион доллар, дея хабар бермоқда ТАСС.

Янги бўр даврига тегишли йиртқичлар скелети 1988 йил АҚШ ҳудудида топилган бўлиб, БААга 12 йил аввал кўчириб ўтилган. «Бу скелет динозаврлар ичида ҳақиқий олмос – Тинкер (тиронназавр қизга қўйилган исм) дунёда топилган ягона ёш қизча, қолган скелетларнинг ҳаммаси вояга етган динозаврларга тегишлидир. Унинг узунлиги 7,5 метрни ташкил этади», — деди галерея раҳбари Ҳолид Сиддиқ.

Палеонтолог олимлар иккинчи скелет Тинкернинг онаси – Регинага тегишли эканлигини аниқлади. Унга йиртқичлар ёнидан топилган, тахмин қилинишича ўлжага айланган ўтхўр гадрозавр скелети ҳам қўшиб сотилади.

Нашриёт журналистлари билан бўлган суҳбатда галереянинг ижрочи директори Шахдод Жаҳонбони 65 миллион йил бирга бўлган она-болани бир-биридан ажратмоқчи эмаслигини, қолаверса, бу таклиф  музейлар учун фойдалироқ эканлигни таъкидлади.

Скелетлар умумий нархи 14 миллион долларни ташкил этади, шулардан 10 миллиони Тинкер учун, атиги 4 миллиони Регина учун сўралмоқда. Ҳолид Сиддиқ иккинчи скелет яхши сақланмагани, фақат 40 фоизи ҳақиқий суяклардан иборат бўлгани учун арзонроқ эканлигини қайд этди.

Амирлик давлат муассаса ва компаниялари потенциал харидор сифатида қаралмоқда. Бирлашган Араб Амирликларида динозаврлар скелетига талаб катта. Шундай скелетлардан бири жаҳонга машҳур супермаркет бўлмиш Dubai Mall'да, икинчиси эса Абу Даби Халқаро аэропортида туради.