O‘zbekiston Respublikasi Bosh prokuraturasida Xitoy Xalq Respublikasi Bosh prokurori Sao Szyanmin rahbarligidagi XXR Oliy xalq prokuraturasi delegatsiyasi a’zolari bilan uchrashuv bo‘lib o‘tdi, deb xabar bermoqda O‘zbekiston Milliy axborot agentligi.
O‘zbekiston Respublikasi Bosh prokurori Rashitjon Qodirov va Xitoy Xalq Respublikasi Bosh prokurori Sao Szyanmin ko‘plab yo‘nalishlar, jumladan, huquqiy sohada O‘zbekiston bilan Xitoy o‘rtasidagi hamkorlik izchil rivojlanib borayotganini ta’kidladi. O‘zaro manfaatli hamkorlikning shartnomaviy-huquqiy asoslari kengaytirilayotgani ikki mamlakat bosh prokuraturalari hamkorligini yanada mustahkamlashga xizmat qilmoqda.
O‘zbekiston va XXR prokuratura idoralarining o‘zaro hamkorligi fuqarolik va jinoyat ishlari bo‘yicha huquqiy yordam berish va ekstraditsiya to‘g‘risidagi davlatlararo shartnomalar, shuningdek, 2000-yil 11-oktabrda imzolangan O‘zbekiston Respublikasi Bosh prokuraturasi va Xitoy Xalq Respublikasi Oliy xalq prokuraturasi o‘rtasida hamkorlik to‘g‘risidagi idoralararo shartnoma asosida amalga oshirilmoqda.
Uchrashuv doirasida 2015-2016-yillarda O‘zbekiston Respublikasi Bosh prokuraturasi va Xitoy Xalq Respublikasi Oliy xalq prokuraturasi o‘rtasida hamkorlik dasturi imzolandi.
“Uchrashuv samarali o‘tdi. Mazkur uchrashuv idoralarimiz o‘rtasidagi o‘zaro manfaatli munosabatlarni yanada rivojlantirish istiqbollarini belgilash imkonini berdi. Idoralararo munosabatlarning shartnomaviy-huquqiy bazasini kengaytirish ham muhim ahamiyatga ega. Bugun imzolangan hamkorlik dasturi ikki mamlakat Bosh prokuraturalari o‘rtasidagi aloqalarni yanada mustahkamlashiga ishonaman”, – dedi XXR Bosh prokurori Sao Szyanmin.
Shuningdek, Xitoy delegatsiyasi a’zolari O‘zbekiston Respublikasi Oliy Majlisi Senati, Ichki ishlar vazirligi va Oliy sudida ham uchrashuvlar o‘tkazdi.
Izoh (0)