O‘zbekiston Respublikasi Prezidenti Islom Karimov joylarda amalga oshirilayotgan ijtimoiy-iqtisodiy islohotlarning borishi, bunyodkorlik ishlari bilan tanishish maqsadida 6-oktabr kuni Andijon viloyatiga tashrif buyurdi. Bu haqda O‘zA xabar bermoqda.
Islom Karimov Oltinko‘l tumanidagi “Ko‘hna vodiy bahori” fermer xo‘jaligi dalalarida bo‘lib, fermerlar, viloyat faollari bilan suhbatlashdi.
Prezident paxtachilikda muayyan hudud iqlimi va tuproq sharoitiga mos serhosil, sifatli tola beradigan yangi navlarni yaratish masalasiga alohida e’tibor qaratdi.
Shundan so‘ng davlat rahbari Oltinko‘l tumani “Dalvarzin” mahalla fuqarolar yig‘ini hududida bunyod etilgan zamonaviy uy-joy massivini borib ko‘rdi.
Bu yil viloyatning 31 qishloq massivida namunaviy loyihalar asosida 977 uy-joy qurilib, foydalanishga topshirildi. Yangi massivlarda tabiiy gaz, elektr energiyasi, ichimlik suvi tarmoqlari tortilib, ichki yo‘llar qurildi. Mahalla guzarlari, savdo va maishiy xizmat ko‘rsatish shoxobchalari, sport majmualari bunyod etildi.
Islom Karimov yangi uy sohiblaridan biri – Otabek Qobulov xonadonida bo‘lib, bu yerda yaratilgan qulayliklar bilan tanishdi, xonadon sohiblarining hayoti, orzu-istaklari bilan qiziqdi.
Davlat rahbari qishloq ahli hech kimdan kam bo‘lmay yashashga haqli ekanini va bu yo‘lda amalga oshirilayotgan ishlarni izchil davom ettirish hamda muntazam takomillashtirib borish lozimligini ta’kidladi.
Islom Karimov Andijon shahridagi Istiqlol ko‘chasi va bu yerda qad rostlagan zamonaviy binolar bilan ham tanishdi.
Prezident ko‘cha qiyofasini yanada yaxshilash, binolarga bezak berishda ranglar mutanosibligini ta’minlash, yo‘l bo‘ylarini obodonlashtirish bo‘yicha zarur ko‘rsatmalar berdi.
Izoh (0)