Kecha “Korzinka.uz” supermarketlar tarmog‘ining Facebook’dagi rasmiy sahifasida endi supermarket binolarida fotosuratga olish mumkin bo‘lgani haqida xabar joylashtirildi.
8-dekabr, yakshanba kuni “Korzinka.uz” o‘zining Facebook sahifasi orqali barcha o‘zbekistonliklarni Konstitutsiya kuni bilan tabrikladi. O‘z tabrigida ushbu Qonunning mamlakatda nafaqat tartib va qonuniylikni ta’minlashi, balki uning har bir fuqaro huquq va erkinliklari kafolati ekanini ta’kidlagan. “Bunday huquqlardan biri jamoat joylarda fotosuratga olishdir”, — deyiladi postda.
“Korzinka.uz” mamlakatimiz va butun dunyodagi supermarket hamda do‘konlarda suratga olishni taqiqlashning huquqiy jihatlarini o‘rganib chiqqanini, natijada bu masala yagona izohga ega emasligi haqidagi xulosa kelganini ma’lum qilgan. “Shunday bo‘lsa-da, Konstitutsiyamizda qayd etilgan tamoyillardan kelib chiqqan holda, tarmoq rahbariyati “Korzinka.uz” supermarketlari jamoat hududlarida fotosuratga olish uchun ruxsat berishga qaror qildi”, — deya ta’kidlangan.
Eslatib o‘tamiz, avvalroq OAVlarda savdo markazlarida suratga olishning taqiqlangani inson huquqlariga to‘g‘ri kelmasligi haqida turli maqolalar paydo bo‘lgan edi. Ijtimoiy tarmoqlarda ham supermarketlarning bunday taqiqni asossiz joriy qilganiga nisbatan shikoyatomuz postlar qoldirilgan, bundan ko‘zlangan maqsad foydalanuvchilar uchun qorong‘i bo‘lib qolgan edi.
Izoh (0)