Ўзбекистонлик автобус ҳайдовчилари учун Германияда юқори маошли иш таклиф қилинмоқда. Бу ҳақда Миграция агентлиги хабар берди.
Унга кўра, Миграция агентлиги Германиянинг PersonaFAIRmittlung ташкилоти билан ҳамкорликда автобус ҳайдовчилари учун иш ўринларини таклиф қилади. Ойлик: 3000 евро (солиқлар ушлаб қолингандан сўнг – 2000 евро атрофида). Иш ўринлари: 300 та
Номзодларга талаблар:
- ёш чегараси: 23-43;
- BC ҳайдовчилик гувоҳномаси;
- немис тилидан А2 ёки B1 даража халқаро тил сертификати;
- судланмаган ва жисмонан соғлом бўлиши.
Имтиёзлар:
- визани расмийлаштириш;
- авиачипта;
- аэропортдан иш жойигача трансфер.
Қайд этилишича, танлаб олинган номзодларга Германияга жўнаб кетиш олдидан (виза жараёни бошланганда 1 ой) SBH Wyest ташкилоти кўмагида “Ватанпарвар” марказида касбий немис тили ўқитилади ва қайта тайёрлов курслари ўтказилади.
Ўзбекистонликлар учун Германияга миграция масаласида бир қатор енгилликлар ишлаб чиқилмоқда. Германияда транспорт, муҳандислик соҳаларида ишлаш истагида бўлган фуқаролар ушбу давлат стандартлари асосида Камбағалликни қисқартириш ва бандлик ҳамда Транспорт вазирликлари қошидаги касбий таълим муассасаларида германиялик мутахассислар томонидан тил ва касбга ўргатилади.
Бундан аввал 2024 йил август ойида Ўзбекистон фуқаролари Латвияга юк автомобилларига техник хизмат кўрсатиш механиги сифатида ишга таклиф этилганди.
Хориждан ишга таклифлар:
- Маош 2,5 минг доллар: Hyundai компанияси ўзбекистонликларни ишга олади
- Маош соатига салкам 13 евро: ўзбекистонликлар Германияга ишга таклиф қилинмоқда
- Ўзбекистонликлар Польшага ишга таклиф қилинмоқда
Литва корхоналари билан 200 нафар Ўзбекистон фуқаросини ишга жойлаштириш тўғрисида келишувга эришилганди. Шунингдек, ўзбекистонликлар Японияга логистика, аэропорт хизмати ва юк ташиш йўналишларида ишга юборилиши айтилганди.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
