Fransiya hukumati G‘azo sektoridagi yordamga muhtoj falastinliklarni mamlakatga evakuatsiya qilishni vaqtincha to‘xtatdi. Bunga fransuz universitetlaridan birida tahsil olayotgan falastinlik talabaning internetga joylagan antisemitik mazmundagi posti sabab bo‘ldi. Bu haqda Fox News xabar berdi.
Ma’lum qilinishicha, student ayol ijtimoiy tarmoqlarga Adolf Gitlerning yahudiylar borasidagi fikrlarini post qilib joylagan. Fransiya tashqi ishlar vaziri Jan-Noyel Barro bu talaba mamlakatni tark etishi kerakligini ta’kidlagan. U hozirda talabaning qanday qilib viza olgani bo‘yicha tergov o‘tkazilayotgani qo‘shimcha qilgan. Mamlakat ichki ishlar vaziri Bryuno Retayo ham holatga munosabat bildirib, X da shunday post qoldirdi:
“Hamas targ‘ibotchilari uchun mamlakatimizda joy yo‘q”.
Internetda tarqalgan ma’lumotlarga ko‘ra, mazkur talaba Gitler rasmi tushirilgan postni qayta ulashgan. Unda arab tilidagi quyidagi yozuv bo‘lgan: “Yahudiylarni hamma joyda qirib tashlang. Men Yerda yahudiy avlodining bo‘lishini xohlamayman. Ular sizni o‘ldirishidan oldin siz ularni o‘ldirishingiz kerak”.
Fransiyaning Siyosiy fanlar instituti — Sciences Po Lille ma’muriyati talabaning bu posti haqida xabar topgach, holatga o‘z munosabatini bildirib, kontent institut qadriyatlariga mutlaqo zid ekanini aytgan. Oliy ta’lim muassasasi antisemitizm, kamsitish va nafratga undovchi har qanday xatti-harakatni qoralagan.
“Fransiya terrorizmni, insoniyatga qarshi jinoyatlarni yoki antisemitizmni targ‘ib qiluvchi xorijiy talabalarni qabul qilish majburiyatiga ega emas”, dedi oliy ta’lim vakillaridan biri.
Fransiya prezidenti Emmanuel Makron bu masala yuzasidan hozircha izoh bermagan. Ayni vaqtda u sentyabr oyida Falastin davlatini tan olish rejasini ilgari surgan va shu sabab AQSH hamda Isroilning tanqidiga uchramoqda.
Ma’lumot uchun, 29-iyul kuni Fransiya va Saudiya Arabistoni vakillari boshchiligida Nyu Yorkda o‘tgan xalqaro konferensiyada G‘azo bo‘yicha “Nyu York deklaratsiyasi” imzolangan edi. Unda HAMASning qurolsizlanishi va G‘azoni Falastin ma’muriyatiga topshirish, shuningdek, Isroil qo‘shinlarining sektorni tark etishi kabi talablar ilgari surilgan.
Izoh (0)