“Barselona” vingeri Lamin Yamal Chempionlar Ligasi yarim final javob uchrashuvida “Inter”ga qarshi kechgan o‘yindan keyin muxlislarga murojaat qildi. Bu haqda Fabrisio Romano o‘zining ijtimoiy tarmoqdagi sahifasida ma’lum qildi.
Futbolchining aytishicha, jamoa bor kuchini berdi, biroq bu safar omad kulib boqmagan. Shuningdek, Lamin ushbu kubokni Kataloniyaga olib kelmaguncha tinchimasligini aytdi:
Bor kuchimizni sarfladik, lekin omad raqib tomonda bo‘ldi. Ishonch bilan aytaman — biz qaytamiz. Futbolchilar “Barselona”ni o‘z o‘rniga, eng yuqori cho‘qqiga olib chiqmaguncha to‘xtamaydi. Men va’damda turaman: Chempionlar Ligasi kubogini Kataloniyaga olib kelaman. Bu yo‘lda hech qachon to‘xtamayman, deya fikr bildirdi Yamal.
Ma’lumot uchun, “Barselona” Chempionlar Ligasi yarim finalining javob uchrashuvida “Inter”ga qo‘shimcha bo‘limlarda 3:4 hisobida yutqazdi va ikki o‘yin natijasiga ko‘ra 6:7 hisobida mag‘lub bo‘lib, finalga chiqa olmadi.
Yamal joriy mavsumda barcha turnirlar doirasida 51 ta uchrashuvda maydonga tushib, 15 ta gol va 24 ta assist muallifiga aylandi. Transfermarkt portaliga ko‘ra, futbolchining hozirgi qiymati 180 million yevroni tashkil etadi.
Izoh (0)