Rossiyadagi qurilishda ishlaydigan migrantlar soni 500 ming kishiga tushib ketdi

Rossiyadagi qurilishlarda ishlayotgan muhojirlar soni 500 ming kishiga tushib ketdi. Bu haqda quruvchilar milliy birlashmasi rahbari Anton Glushkovga tayanib, “RIA Novosti” xabar berdi.

Bunday ko‘rsatkich I chorak yakunlari bo‘yicha qayd etilgan. U 2024-yilga nisbatan 15-20 foizga past. Biroq qurilishda band bo‘lgan ishchilarning umumiy sonida migrantlar ulushi oshib, 14-15 foizni tashkil etgan.

Glushkov bu tendensiyani Rossiyada qurilish sur’atlarining sekinlashuvi va bir vaqtning o‘zida migratsion siyosatning qat’iylashuvi bilan izohlagan. Bu jarayonlarning ikki jihatdan ijobiy tomoni borligini aytgan:

Birinchidan, xorijiy ishchi kuchining sifati, mening ekspertlik baholashim nuqtayi nazaridan, o‘sib bormoqda... Ikkinchidan, rossiyaliklarga xorijiy ishchi kuchi bilan raqobatga dosh berish osonlashdi. Agar ilgari ish beruvchilar mehnatning arzonligi tufayli migrantlarni afzal ko‘rgan bo‘lsa, endi chet elliklar foydasiga 30-40 foizlik tafovut yo‘qoldi. Ish haqi bo‘yicha rossiyaliklar foydasiga farq hududga qarab 10-15 foizdan oshmaydi, dedi u.

Glushkovning eslatishicha, so‘nggi bir necha yil davomida Tojikiston va O‘zbekiston kabi Rossiya qurilishlari uchun ishchi kuchi manbai bo‘lgan an’anaviy mehnat bozorlariga BAA va Saudiya Arabistoni kompaniyalari ham katta qiziqish bildirmoqda. Ular ham Rossiya ish beruvchilari bilan ishchi kuchi uchun raqobatlashmoqda.

Shu sababli u yaqin yillarda Rossiya qurilishlarida yangi ishchi kuchi manbalari sifatida Hindiston va Pokiston maydonga chiqishini aytdi. Glushkov bunga misol sifatida Qirg‘izistonni keltirdi — bu yerda pokistonlik migrantlar allaqachon mehnat bozorida faol ishlatilmoqda.