Argentinaning “River Pleyt” klubi futbolchisi Franko Mastantuono faoliyatini Ispaniyaning “Real Madrid” jamoasida davom ettiradi. “Qaymoqranglilar” rahbariyati 17 yoshli vunderkindning shartnomasida ko‘rsatilgan tovon puli — 45 million yevroni to‘lashga rozi bo‘ldi. Futbolchining o‘zi ham transferga “yashil chiroq yoqqan.”
TyC Sports nashrining xabar berishicha, kelishuv allaqachon yakunlangan. Endilikda Mastantuono “Real” safiga qachon qo‘shilishi borasidagi savol ochiq qolmoqda. Transfer klublar o‘rtasidagi Jahon chempionati boshlanishidan oldin yoki musobaqa yakunlangach amalga oshirilish ehtimoli bor. Hozir tomonlar bu borada muzokaralar olib bormoqda.
Avvalroq, Mastantuono Parijning “PSJ” klubiga o‘tishi mumkin edi, biroq “Real”dan taklif tushgach, u fikrini o‘zgartirdi va madridliklar bilan shartnoma imzolashga rozi bo‘ldi. Shuningdek, futbolchiga “Milan” va “Atletiko” klublari ham qiziqish bildirgan.
Joriy mavsumda Franko Mastantuono “River Pleyt” tarkibida 17 ta o‘yinda maydonga tushib, o‘z hisobiga 6 ta gol va 4 ta golli uzatma yozdirib qo‘ygan. Uning klubi bilan shartnomasi 2026-yilning oxirigacha amal qiladi. Transfermarkt portali Mastantuononing qiymatini 15 million yevroga baholagan.
Izoh (0)