Ukrainadan so‘ng Rossiya ham dronlarni urib tushirishda Ikkinchi jahon urushi samolyotlaridan foydalanmoqda. Rus muhandislari “Yak-52” o‘quv samolyotini “Yak-52B2” darajasida modernizatsiyadan o‘tkazib, uchuvchisiz uchish qurilmalariga qarshi “ad-hoc” jangovar samolyotiga aylantirdi.
Rus manbalarining yozishcha, bu bilan konstruktorlik byurolaridan biri shug‘ullangan bo‘lib, Afg‘on urushi davrida ishlab chiqilgan “Yak-52B” “yengil hujumchi” samolyotlari tajribasiga murojaat qilingan.
“Yak-52B2” modeli modernizatsiya natijasida “dronlarga qarshi qiruvchi” tavsifini oldi. Shuningdek qanotlari ostiga 90 kg dan yuk ortish imkoniyatiga ega bo‘ldi. Ruslar bundan havo nishonlarini uzoq masofadan aniqlash va kuzatish imkonini beruvchi sensor minorasi hamda 12 kalibrli ov miltig‘i o‘rnatishda foydalangan.
Mazkur loyiha uchun “Yak-52” bejiz tanlab olingani yo‘q. Mahalliy manbalarga ko‘ra, samolyotning texnik xususiyatlari bu vazifa uchun Cessna-172 va “Yak-18T” kabi havo bortlaridan ko‘ra munosibroqdir. Qolaversa, Rossiyada mazkur turdagi samolyotlarning yirik parki mavjud.
Kuzatuvchilar “Yak-52B2” qanotlari ostiga ov miltig‘i o‘rnatilganiga diqqat qaratdi. Garchand bu turdagi qurollar frontning har ikki tomonida ham qo‘llanilayotgan bo‘lsa-da, faqat 50 metr masofada talafot yetkazadi. Biroq u an’anaviy patronlar o‘rniga droblar (mayda zarrachalar) sochgani bois plastik korpusga ega dronlarga qarshi samaralidir. Qolaversa, Rossiya qonunchiligi bundan jiddiyroq quroldan foydalanishga ruxsat bermagan. Misol uchun “PKMT” pulemyotini qo‘llash g‘oyasi yerdagi insonlarga zarar yetkazish xavfi mavjudligi bois rad etilgan.
E’tiborlisi, past balandlik va tezlikda uchuvchi dronlarga qarshi “Yak-52” samolyotlarini qo‘llash g‘oyasi ukrainaliklarga tegishli. Biroq ular bundan primitiv usulda foydalangan edi. Ya’ni bir uchuvchi samolyotni boshqargan, ikkinchisi esa nishonga qo‘lda zarba bergan. Bu samolyot fonari ochiq holatda amalga oshirilgan. Rus konstruktorlik byurosi jarayonni avtomatlashtirdi.
Qayd etilishicha, “Yak-52B2” nafaqat uzoq masofali uchuvchisiz uchish qurilmalari, balki Aeroprakt A-22 kabi gibrid dron-samolyotlarni ham urib tushirishga mo‘ljallangan.
Izoh (0)