“Chorsu” bozoridagi yong‘indan zarar ko‘rgan maydonlar taʼmirlab berilishi ma’lum qilindi

Toshkentdagi “Chorsu” bozori hududidagi do‘konlarda 28-iyunga o‘tar kechasi yong‘in sodir bo‘lgandi. Poytaxt hokimligi yong‘indan zarar ko‘rgan maydonlarni tiklash bo‘yicha ishchi guruh tuzilganini e’lon qildi.

Ma’lum qilinishicha, yong‘in bozorning Beruniy va Saqichmon ko‘chalari kesishmasi yaqinida joylashgan do‘konlari va omborlarida yuz bergan. Bir necha soat ichida yong‘in bartaraf etilgan. Ayni vaqtda hodisa oqibatlarini bartaraf etish bo‘yicha ishlar davom etmoqda. Mutaxassislar yong‘in sabablarini aniqlamoqda, shuningdek, yetkazilgan zarar miqdorini baholamoqda.

Shahar va tuman hokimliklari vakillari yong‘indan zarar ko‘rgan tadbirkorlar bilan uchrashdi. Ishchi guruh zarar ko‘rgan maydonlarni taʼmirlash, tiklash va ishga tushirish masalalarini samarali va tezkor hal etish maqsadida tuzildi. Tez orada barcha binolar ta’mirlanib, ularda yanada yaxshi ish sharoitlari yaratiladi. Ishlar yakuniga qadar esa hozirda tadbirkorlar faoliyatini davom ettirishlari uchun boshqa binolar ajratilgan.

Xabarda aytilishicha, yong‘in bozorning umumiy faoliyatiga ta’sir qilmay, u odatiy tarzda ishini davom ettirmoqda.