Buyuk Britaniya hukumati migratsiya siyosatini kuchaytirishni nazarda tutuvchi “Oq kitob” loyihasini e’lon qildi. Bosh vazir Kir Starmer migratsiya muammosini hal qilishning yangicha yondashuvi “chegarada nazorat”ni tiklashini aytdi.
Britaniya hukumati saytida e’lon qilingan “Immigratsiya tizimi ustidan nazoratni tiklash” deb nomlangan reja 82 sahifadan iborat. Yangi chora-tadbirlar migratsiya oqimini sezilarli darajada kamaytirish, chegara nazoratini kuchaytirish va milliy mehnat bozorini qo‘llab-quvvatlashga qaratilgan.
Asosiy yangiliklardan biri doimiy yashash uchun ruxsatnoma (ILR) olish talablarni kuchaytirish bo‘ladi. Endi buning uchun Buyuk Britaniyada avvalgidek besh yil emas, 10 yil yashash kerak bo‘ladi. Istisnolar faqat Britaniya iqtisodiyoti yoki jamiyatiga katta hissa qo‘shganlar uchun ko‘zda tutilgan.
Buyuk Britaniyaga yashash uchun kelgan xorijliklar ingliz tilini bilishning bazaviy darajasini tasdiqlashlari shart. Rasmiylarga ko‘ra, bu muhojirlarning Britaniya jamiyatiga yaxshiroq integratsiyalashuviga yordam beradi, shuningdek, ularning muvaffaqiyatli ishga joylashish imkoniyatlarini oshiradi.
Islohot deportatsiya tizimiga ham ta’sir qiladi. Ichki ishlar vazirligiga nafaqat real muddatga hukm qilinganlar, balki jinoyati uchun sudlangan barcha chet el fuqarolari haqida ma’lumot kelib tushadi.
Starmer avvalgi hukumatlarni immigratsiyaning “nazoratdan chiqib ketishiga” yo‘l qo‘yganlikda va amalda Buyuk Britaniya chegaralarini ochganlikda aybladi. Siyosatchi 2019-yildan 2023-yilgacha muhojirlar soni 4 baravar ko‘payib, deyarli 1 million kishiga yetgani, bu Birmingem aholisiga to‘g‘ri kelishini aytdi.
Starmer migratsiya Buyuk Britaniya milliy tarixining bir qismi ekanini tan oldi va chet ellik ishchilarning qirollik iqtisodiyotiga qo‘shgan hissasini kamsitmasligini aytdi.
Lekin odamlar yurtimizga kelar ekan, ular ham integratsiyaga intilishi, tilimizni o‘rganishi kerak. Menimcha, bu adolatdan, dedi u
2020-yilda Buyuk Britaniya Yevropa Ittifoqidan uzil-kesil chiqib ketganidan so‘ng, chegaralarni nazorat qilish va muhojirlar oqimini cheklash London uchun ustuvor vazifaga aylandi. 2024-yil avgust oyida Starmer boshchiligidagi hukumat 6 oy ichida noqonuniy muhojirlarni deportatsiya qilishni 2018-yildan beri eng yuqori darajaga ko‘tarishga va’da berdi.
Mamlakatning bu yo‘nalishdagi markaziy muammolaridan biri La-Manshni qayiqlarda kesib o‘tadigan noqonuniy muhojirlardir. Ularning soni so‘nggi yillarda muttasil oshib bormoqda. Oksford universiteti migratsiya observatoriyasi ma’lumotlariga ko‘ra, 2022-yilda La-Manshni 46 ming kishi shu tarzda kesib o‘tgan. O‘sha yilning iyun oyidan boshlab Buyuk Britaniya Ruandaga noqonuniy muhojirlarni jo‘nata boshlagandi.
Izoh (0)