Буюк Британия ҳукумати миграция сиёсатини кучайтиришни назарда тутувчи “Оқ китоб” лойиҳасини эълон қилди. Бош вазир Кир Стармер миграция муаммосини ҳал қилишнинг янгича ёндашуви “чегарада назорат”ни тиклашини айтди.
Британия ҳукумати сайтида эълон қилинган “Иммиграция тизими устидан назоратни тиклаш” деб номланган режа 82 саҳифадан иборат. Янги чора-тадбирлар миграция оқимини сезиларли даражада камайтириш, чегара назоратини кучайтириш ва миллий меҳнат бозорини қўллаб-қувватлашга қаратилган.
Асосий янгиликлардан бири доимий яшаш учун рухсатнома (ИLR) олиш талабларни кучайтириш бўлади. Энди бунинг учун Буюк Британияда аввалгидек беш йил эмас, 10 йил яшаш керак бўлади. Истиснолар фақат Британия иқтисодиёти ёки жамиятига катта ҳисса қўшганлар учун кўзда тутилган.
Буюк Британияга яшаш учун келган хорижликлар инглиз тилини билишнинг базавий даражасини тасдиқлашлари шарт. Расмийларга кўра, бу муҳожирларнинг Британия жамиятига яхшироқ интеграциялашувига ёрдам беради, шунингдек, уларнинг муваффақиятли ишга жойлашиш имкониятларини оширади.
Ислоҳот депортация тизимига ҳам таъсир қилади. Ички ишлар вазирлигига нафақат реал муддатга ҳукм қилинганлар, балки жинояти учун судланган барча чет эл фуқаролари ҳақида маълумот келиб тушади.
Стармер аввалги ҳукуматларни иммиграциянинг “назоратдан чиқиб кетишига” йўл қўйганликда ва амалда Буюк Британия чегараларини очганликда айблади. Сиёсатчи 2019 йилдан 2023 йилгача муҳожирлар сони 4 баравар кўпайиб, деярли 1 миллион кишига етгани, бу Бирмингем аҳолисига тўғри келишини айтди.
Стармер миграция Буюк Британия миллий тарихининг бир қисми эканини тан олди ва чет эллик ишчиларнинг қироллик иқтисодиётига қўшган ҳиссасини камситмаслигини айтди.
Лекин одамлар юртимизга келар экан, улар ҳам интеграцияга интилиши, тилимизни ўрганиши керак. Менимча, бу адолатдан, деди у
2020 йилда Буюк Британия Европа Иттифоқидан узил-кесил чиқиб кетганидан сўнг, чегараларни назорат қилиш ва муҳожирлар оқимини чеклаш Лондон учун устувор вазифага айланди. 2024 йил август ойида Стармер бошчилигидаги ҳукумат 6 ой ичида ноқонуний муҳожирларни депортация қилишни 2018 йилдан бери энг юқори даражага кўтаришга ваъда берди.
Мамлакатнинг бу йўналишдаги марказий муаммоларидан бири Ла-Маншни қайиқларда кесиб ўтадиган ноқонуний муҳожирлардир. Уларнинг сони сўнгги йилларда муттасил ошиб бормоқда. Оксфорд университети миграция обсерваторияси маълумотларига кўра, 2022 йилда Ла-Маншни 46 минг киши шу тарзда кесиб ўтган. Ўша йилнинг июнь ойидан бошлаб Буюк Британия Руандага ноқонуний муҳожирларни жўната бошлаганди.
Изоҳ (0)