Jahon banki missiyasining tashrifi doirasida Markaziy bank tomonidan xorijiy davlat qimmatli qog‘ozlariga investitsiya kiritildi. Bu haqda regulyator matbuot xizmati xabar berdi.
Qayd etilishicha, 27-31-may kunlari Jahon banki G‘aznachiligi ekspertlarining texnik ko‘mak missiyasi bo‘lib o‘tgan. Missiya davomida xalqaro zaxiralarni boshqarishda diversifikatsiyaning ahamiyati, jumladan, xorijiy davlatlar qimmatli qog‘ozlarni zaxiralar tarkibiga kiritish, xatarlarni baholash hamda Markaziy bankning tegishli tarkibiy bo‘linmalari ish jarayonini samarali tashkil etish bo‘yicha maxsus treninglar o‘tkazilgan.
Xususan, qimmatli qog‘ozlarga investitsiya kiritishda risklarni boshqarish, savdo va hisob-kitob amaliyotlarini o‘tkazish, buxgalteriya hisobi va komplayens-nazoratni amalga oshirish masalalari yuzasidan malaka oshirilgan.
Shu bilan birga, mamlakatimiz tarixida ilk bor Markaziy bank zaxiralarini diversifikatsiya qilish maqsadida qimmatli qog‘ozlarga birlamchi investitsiya kiritish amaliyotlari o‘tkazildi hamda tegishli portfellar shakllantirildi, — deyiladi xabarda.
Missiya yakunida Jahon banki G‘aznachiligi ekspertlarining xalqaro zaxiralarni boshqarish va tegishli tarkibiy bo‘linmalar faoliyatini takomillashtirish bo‘yicha tavsiyalari olingan hamda zaxiralar tarkibiga yangi moliyaviy instrumentlarni kiritishni davom ettirish va Markaziy bank xodimlari malakasini oshirishga doir kelgusida amalga oshiriladigan ishlar yuzasidan kelishuvga erishilgan.
Eslatib o‘tamiz, 2023-yil oktyabr boshlarida O‘zbekiston ilk bor 4,25 trln so‘m miqdoridagi yashil suveren xalqaro obligatsiyalar hamda 660 mln dollar miqdoridagi xalqaro obligatsiyalarni London fond birjasida joylashtirgandi. So‘mda chiqarilgan suveren xalqaro obligatsiyalar MDH davlatlari ichida ilk “yashil” suveren obligatsiyalar hisoblanadi.
Izoh (0)