Бугун, 5 март куни Сенатда Коррупцияга қарши курашиш бўйича миллий кенгаш йиғилиши бўлиб ўтмоқда. Унда президент Шавкат Мирзиёев нутқ сўзлаб, тизимдаги айрим муаммоларни санади. Бу ҳақда президент матбуот котиби Шерзод Асадов хабар берди.
Йиғилишда давлат раҳбари Коррупцияга қарши курашиш агентлиги фаолиятидан мутлақо норозилигини айтган.
Агентлик ходимлари вазирликларга, ҳудудларга бориб, аниқ бир соҳани таҳлил қилиб, муаммоларга ечим бериш ўрнига, қўзғатилган жиноят ишларини санайдиган қуруқ статист бўлиб қолгани таъкидланган.
Агентлик раҳбарияти коррупция ҳолати энг кўп бўлган туман соғлиқни сақлаш, бандлик бўлими ёки банк филиалига бориб, ҳолатни ўрганмагани, янги замонавий тизим бўйича таклиф бермагани кўрсатиб ўтилган. Ушбу соҳаларнинг бевосита раҳбарларининг ўз тизимини “коррупциядан холи” қилиш ишлари сустлиги танқид қилинган.
Президент топшириғи билан инвестиция дастурлари устидан назорат кучайтирилганидан кейин ўтган йилнинг ўзида 3 триллион сўм иқтисод бўлди. Ёки соғлиқни сақлаш тизимида “Ситуацион марказ” ишга туширилгани ҳисобига 2024 йилда 1,2 триллион сўмлик мақсадсиз харажатларнинг олди олинди. Лекин, нега бу ишлар президент топшириқ берганидан кейин бошланиши керак?, деган Шавкат Мирзиёев.
Парламентдаги бюджет қўмиталарида ҳам ҳар йили бюджетдан энг кўп маблағ оладиган учта вазирликка бориб, коррупциявий омилларни аниқлашда ва ўзгариш қилишда ташаббускорлик етишмаётгани қайд этилган.
Шу билан бирга, йиғилишда ҳуқуқ-тартибот идоралари асосан коррупцияни аниқлаш ва жазолаш билан ишлаётгани, коррупциявий омилларни таг-томири билан йўқотадиган превентив чораларни эътиборсиз қолдираётгани айтилган.
Маълум қилинишича, ҳозирда коррупциянинг олдини олиш, омиллари билан ишлаш учун 117 та вазирлик ва идорадаги “коррупцияга қарши ички назорат” тузилмаларида 1 минг 285 ходим ишламоқда. Лекин коррупциявий омилларни бартараф этишда уларнинг ўрни ҳам, масъулияти ҳам сезилмаётгани таъкидланган.
Изоҳ (0)