АҚШ федерал судларига ҳужжатларни топширишнинг электрон тизими кенг кўламли киберҳужумга учради. Бу ҳақда Politico газетаси ўз манбаларига таяниб хабар берди.
Бузиб кириш 4 июль куни аниқланган. Нашрнинг таъкидлашича, бунинг оқибатида судларнинг махфий маълумотлари, жумладан, гувоҳларнинг шахсий маълумотлари ошкор бўлиши мумкин эди. Бузиб кирилган тизим икки қисмдан - жараён иштирокчилари ҳужжатларни юклаш учун фойдаланадиган ишларни бошқариш платформаси ва фуқароларнинг ушбу маълумотларга чекланган кириш платформасидан иборат. Тизимда гувоҳлар ва айбланувчилар ҳақидаги маълумотлардан ташқари, қамоққа олиш ва тинтув ўтказиш учун ордерлар тўғрисидаги маълумотлар ҳам мавжуд.
Ҳозирча бузиб киришнинг айбдорлари ва хакерларнинг тизимга қандай киргани номаълум. Ҳужумда давлат тузилмаларига алоқадор шахслар, шунингдек, жиноий ташкилотлар гумон қилинмоқда.
Бузиб кириш натижасида битта суд округида 12 га яқин суд баённомаси қалбакилаштирилган бўлиши мумкин. Нашрнинг суд тизими вакилларидан бири “бундай даражадаги бузиб кириш”ни илк бор кўраётганини айтди.
Ҳодиса энг ҳимояланган гувоҳларга таъсир кўрсатмаган, чунки алоҳида хавф остида бўлганларнинг ҳақиқий маълумотлари Адлия вазирлигининг алоҳида тизимларида сақланади.
Май ойида АҚШда хакер алоқа хизмати базасига кириб, 60 га яқин амалдорнинг маълумотларини ўғирлагани хабар қилинганди.
Изоҳ (0)