Сирдарёда Cobalt олиб қочган икки йигитни ИИБ ходими Бўка туманида тўхтатишга уринган. Йигитлар ходимни пичоқлаб, унинг Matiz’ини ҳайдаб кетган. Кейинроқ тўхташ ишорасини берган ЙПХ инспекторини машинада уриб юборган.
Kun.uz манбасига таяниб хабар беришича, ҳолат 2025 йил 2 август куни содир бўлган. Андижон вилояти Хўжаобод туманида яшовчи Ф.Ш. ҳамда Ф.Х. (иккиси ҳам 2007 йилда туғилган) Наманган вилоятига кетиш мақсадида Самарқанд шаҳридан йўловчи сифатида фуқаро А.Н. бошқарувидаги Cobalt машинасига минган. Сирдарё вилояти ҳудудида ҳайдовчи ҳожатхонага кириб кетганида икки йигит машинани олиб қочган.
Соат 3:15 да Сирдарё вилояти ИИБ 102 хизматига Оқолтин тумани ҳудудидаги газ заправкадан Cobalt номаълум шахслар томонидан олиб қочилгани ҳақида хабар келиб тушган.
Хабарга асосан вилоят ҳудудидаги барча ЙПХ инспекторлари, ЙПХ масканлари ва блок-постлар огоҳлантирилган. Мавжуд камералардан ўғирланган машинанинг ҳаракат йўналишини аниқлаш ишлари олиб борилган. Бироқ жиноятчилар машинанинг давлат рақам белгисини ечиб ҳаракатланган.
Сайхунобод тумани ҳудудидаги Бўка блок-постида хизмат олиб бораётган ЙПХ инспекторига ушбу ҳолат дарҳол етказилиб, тегишли топшириқ берилган. Соат 04:24 да ушбу блок-постга давлат рақам белгиси бўлмаган оқ рангли Cobalt машинаси кириб келган. ЙПХ инспектори уни тўхтатиб, ҳужжатларини сўраган. Машинани бошқариб бораётган ҳайдовчи ҳужжатларни тақдим этиб, постдаги ёпиқ ҳолда турган иккинчи йўлакдан машина бошқариб, номаълум томонга кетиб қолган.
Гумонланувчилар олиб қочилган машинада Тошкент вилояти Бўка тумани ҳудудида ҳаракатланиб кетаётганида уларни Бўка тумани ИИБ Тезкор-қидирув хизмати Жиноят қидирув бўлинмаси тезкор вакили Н.Ш. кўриб, ушлашга уринган. Аммо улардан бири ходимнинг бўйнига пичоқ билан жароҳат етказган. Сўнгра йигитлар ўзлари олиб қочган Cobalt’ни ўша ерда қолдириб, ходимнинг Matiz машинасини ҳайдаб, қочиб кетган.
Шундан сўнг гумонланувчилар Тошкент вилояти Оҳангарон туманида ҳаракатланиб кетаётганида уларга ЙПХ инспектори Х.Д. тўхташ ишорасини берган. Бироқ улар инспекторнинг талабига бўйсунмай, уни машинада уриб юбориб, йўлда давом этишган. Инспектор эса оёғидан жароҳатланиб, шифохонага мурожаат қилган.
Олиб борилган тезкор-қидирув ишлари натижасида гумонланувчи шахслар Оҳангарон шаҳри ҳудудида ушланган.
Изоҳ (0)