Германиялик мутахассис Йоахим Лёв Ўзбекистон терма жамоасини бошқармайди. Bild нашрининг хабарига кўра, тажрибали мутахассис Ўзбекистон футбол ассоциациясининг таклифини рад этган.
Австриянинг оe24 нашри эса ушбу хабарга аниқлик киритиб, ЎФА Йоахим Лёвни Ўзбекистон терма жамоаси бош мураббийи лавозимига тайинлаш мақсадида “махфий музокаралар” олиб борганини маълум қилган. Манбага кўра, ушбу музокараларда Германиядаги Ўзбекистон элчихонаси вакиллари ҳам иштирок этган. Bild нашрининг ёзишича, 65 ёшли мутахассис бир неча кун давомида таклиф устида жиддий ўйлаб кўрган, бироқ якунда Ўзбекистон футбол ассоциациясининг таклифини рад этган.
Эслатиб ўтамиз, Ўзбекистон терма жамоаси ўз тарихида илк бор футбол бўйича Жаҳон чемпионати йўлланмасини қўлга киритди.
Маълумот ўрнида, Йоахим Лёв 2006 йилдан 2021 йилгача Германия терма жамоасини бошқарган. Унинг бошқарувидаги “немис машинаси” 2014 йилда Бразилияда ўтган Жаҳон чемпионатида чемпионликни қўлга киритган.
Изоҳ (0)