“Эроннинг ерости бойликлари 27,5 трлн долларни ташкил этади” – Эрон ҳукумати вакили

Эроннинг ерости бойликлари 27,5 триллион долларни ташкил этади. Бу ҳақда Эрон табиий ресурслар ва минерал захиралар вазири ўринбосари, Геология ва қидирув ташкилоти раҳбари Даруш Исмоилий маълум қилди.

Унинг сўзларига кўра, бу кўрсаткич бўйича Эрон дунёда Россия, АҚШ, Саудия Арабистони ва Канададан кейин 5-ўринни эгаллайди.

Унинг таъкидлашича, Эрон 1,4 триллион долларлик фойдали қазилмаларга эга.

“Буларнинг камида 5 фоизи минерал хом ашёдир. Умумий инвестиция ҳажми 29 миллиард доллар бўлган конларни қидириш учун рухсатномалар берилган. Бу захираларнинг атиги 2 фоизи ўрганилганини англатади”, дейди Даруш Исмоилий.

Исмоилий геология-қидирув ишларини олиб бориш зарурати ҳеч кимга сир эмаслигини билдирган.

“Тоғ-кон ва минерал-қайта ишлаш секторидан 10 триллион доллар олиш мумкин”, дейди вазир ўринбосари.

Бундан аввал Эрон аҳолиси 2025 йилнинг иккинчи чорагида олтин харид қилишни кескин кўпайтиргани хабар қилинганди. 

Эроннинг олтин захиралари

Эрон Марказий банки мамлакат олтин захираларини бошқаради. 2023 йил ҳолатига кўра, Эрон расмий равишда 340 тоннага яқин олтин захирасига эга. Бу Эронни минтақадаги энг йирик олтин эгаларидан бирига айлантиради. Жаҳон олтин кенгаши маълумотларига кўра, мамлакат Евросиё минтақасида ўртача юқори захира эгаси ҳисобланади. Глобал рейтингда эса 30–40-ўринлар ўртасида жойлашган.

Маълумот учун, Эрон ҳудудида бир нечта олтин конлари мавжуд, хусусан, Заршуран кони — энг йирик ва энг ривожланганлардан бири. Бундан ташқари, Эронда Қизил Қанд, Дашкасан ва Сагҳанд конлари ҳам фаолият юритади. 2022–2023 йилларда Эрон йилига 10–15 тонна олтин қазиб олган.