Россия президенти Владимир Путин 15 август куни АҚШ раҳбари Дональд Трамп билан Аляскада учрашади. Президентлар музокараси арафасида Россия армияси Донецк вилоятини тўлиқ назоратга олиш режаси доирасида Доброполе шаҳрига чуқурроқ кириб борди. Бу ҳақда Reuters хабар берди.
Кремлнинг собиқ маслаҳатчиси Сергей Марков ҳарбий силжишлар музокараларда Россияга устунлик беришини айтди, бу Украина томонидан ҳудудий ён босишга олиб келишига ишонмоқда.
Бу ғалаба Путин ва Трамп учун музокараларда совға бўлди, деди Сергей Марков.
Трамп аввалроқ ҳар қандай тинчлик келишуви “айрим ҳудудларни алмашиш”ни ўз ичига олишини айтганди. Украина президенти Владимир Зеленский эса бунга қатъий қарши чиқиб, Россия “фақат олдинга силжимаслик, аммо эгалланган ҳудудлардан чиқмаслик”ни таклиф қилаётганини айтган. У ҳудуд алмашиш масаласи музокаралар кун тартибида йўқлигини таъкидлаган.
Оқ уйга кўра, икки томонлама учрашув Путин ташаббуси билан бўлиб ўтади. Шу сабабли унга Зеленский таклиф этилмаган. Трамп эса “урушни қандай тугатиш мумкинлиги” ҳақида яхшироқ тушунча ҳосил қилиш учун учрашишга рози бўлган. Шунингдек, АҚШ президенти уч томонлама форматга ҳам тайёр экани айтилмоқда.
Трамп–Путин музокаралари
15 август куни Аляскада ўтказиладиган музокараларда Россиянинг Украинага қарши урушини тўхтатиш муҳокама қилинади. Европа сиёсатчилари учрашувга чақирилмагани боис норозилик билдирган. Хусусан, Франция президенти Эммануэл Макрон Украина келажагини украинлар ва Европасиз ҳал қилиб бўлмаслигини айтган.
Бугун эса Британия расмийлари Европа иттифоқи етакчиларини Трамп–Путин учрашуви бўйича “фойдасиз изоҳлар”дан тийилишга чақирди. Уларнинг фикрича, Трампга нисбатан очиқ талаблар тескари таъсир кўрсатиши мумкин.
Учрашув куни Алясканинг Анкориж шаҳри устидаги ҳаво бўшлиғи ёпилади. Путинни Россия хавфсизлик кучлари ва АҚШ Махфий хизмати биргаликда қўриқлайди. Маълумотларга кўра, сиёсий келишмовчиликлар президентлар ташрифлари чоғидаги хавфсизлик протоколларига таъсир қилмайди.
Изоҳ (0)