Сомалида қўлга олинган 24 ёшли ИШИД жангариси ўқ отиш орқали ўлимга ҳукм қилинади. У қатл олдидан Sky News телеканалига интервью бериб, қилмишидан афсусланмаслигини очиқ айтди.
Жангари ИШИД қўмондони сифатида фаолият юритган, снайперликка тайёргарлик кўрган ва портловчи қурилмалар тайёрловчи гуруҳ таркибида бўлган. ИШИД ҳозирда Сомали шимолидаги ярим автоном ҳудуд — Пунтланд ғорларида глобал штаб-квартирасини жойлаштирган. У шу ердан бутун дунё бўйлаб фаолиятини молиялаштирмоқда.
Мутҳар Ҳамид Қоийид асли ямандлик бўлиб, денгиз йўли орқали Сомалига келган. У ўзини бомба тайёрловчи гуруҳнинг фаол аъзоси эмаслигини таъкидлайди.
“Мен портловчи қурилма тугмасини босмаганман. Фақат қараб турганман. Бомбани бошқа одам ясаб, уни портлатган. Мен мусулмонларни ўлдириш учун бу ерга келмаганман. Ҳеч нарсадан афсусланмайман. Ҳозир хонадан олиб чиқиб отиб ташласангиз ҳам, мен афсусланмайман. Мени отишса ёки осишса ҳам фарқи йўқ. Охир-оқибат менга бари бир”, деган у журналистларга жилмайиб.
Шу билан бирга, Ҳамид Қоийид унинг оиласи ИШИДни ёқтирмаслигини қайд этган.
“Агар улар мени бу ерда топса, хафа бўларди”, дея таъкидлаган жангари.
Ундан бомбалар туфайли одамлар ҳалок бўлганидан хабардор ёки йўқлиги сўралганида, у қуйидагича жавоб қайтарган.
“Ҳа, лекин бомбалар ҳаммани ўлдирмайди. Фақат кофирларни”, деган у.
Пунтланддаги ИШИД ғорларидан жангариларга тегишли хорижий паспортлар топилган. Улар орасида Жанубий Африка, Германия, Саудия Арабистони, Венесуэла ва Баҳрайн фуқароларининг, ҳатто болаларнинг ҳам ҳужжатлари мавжуд.
Маълумотларга кўра, 2024 йил декабрь ойидан бери давом этаётган Пунтланд армияси ҳужуми чоғида ўлдирилган 600 нафар ИШИД аъзосидан атиги бештаси сомалилик бўлган.
“Асосий мақсад — дунёни бошқариш эди”
Яна бир ИШИД жангариси, марокашлик Усмон Букукар Бин Фуад ҳам журналистларга интервью берди. У террорчилик ташкилоти томонидан алданиб, фақатгина пул ишлаб топиши мумкинлигини эшитгани учун Сомалига борганини айтди.
“Бунинг ўрнига мен ғор қазишга мажбур бўлдим. Қочиш қийин эди, лекин улар менга Пунтланд кучларини ўлдириш учун ўз жонимни портлатадиган жилет кийишни буюрганида, ъбу менга ваъда қилган ишингиз эмасъ дедим ва қочдим”, дейди у.
Фуад унинг қўлига қурол беришганини айтди, бироқ ундан ҳеч қачон фойдаланмаганини таъкидлади.
“Мен ҳеч қачон жангда қатнашмаганман. Қуролим (АК-47) бор эди, лекин мен фақат оддий ишларни — бир жойдан иккинчи жойга таъминот олиб борардим ва буйруқларни бажарардим”, деди у.
У Сомалидаги ИШID етакчиси Абдул Қодир Мўмин билан бир неча марта учрашганини айтди. Фуаднинг сўзларига кўра, унга снайперлик (у тугатмаган) ва харита бўйича машғулотлар берилган, бироқ Пунтланд армияси ҳужуми бошлангач, улар тўхтатилган.
“Асосий мақсад дунёни бошқариш эди. Сомалидан бошланиб, кейин Эфиопия ва қолган дунё забт этилиши режалаштирилган. Босасо, Эфиопия ёки Яманга жангарилар юбориш ҳақида кўп гапларни эшитганман. Одамларни дунёнинг бошқа жойларига юбориш ва бутун дунёни бошқариш режага кирган эди, дея хулоса қилди у.
Изоҳ (0)