Америка Қўшма Штатлари президенти Дональд Трамп ва Исроил бош вазири Биньямин Нетаньяху ўртасида тортишув юзага келган. Бу ҳақда НБС News телеканали хабар берди.
Манбага кўра, Трамп Нетаньяху билан Ғазодаги очлик масаласини муҳокама қилган. Исроил бош вазири эса Ғазода аҳоли очликдан қийналаётганини тан олмаган. Трамп эса бунга жавобан суҳбатдошига бақирган.
Нетаньяхунинг фикрича, Ғазо аҳолиси очликдан қийналаётгани ҳақидаги хабарлар ҲАМАС томонидан тўқиб чиқарилган уйдирма. Трампга эса ёрдамчилари болаларнинг очарчиликдан қийналаётгани ҳақидаги фактларни тақдим этган.
АҚШнинг собиқ амалдорларидан бирининг айтишича, Америка президенти ва Биньямин Нетаньяху ўртасидаги суҳбат гуманитар мавзуларга қаратилган ва унда асосан Трамп гапирган.
Трамп ва Нетаньяху ўртасидаги муносабатлар кескинлашуви Исроил бош вазирининг 27 июль куни Исроилда ўтказилган тадбирдаги чиқишидан кейин юз берди. Бош вазир тадбир давомида: “Ғазода очлик йўқ. Ғазода очлик сиёсати ҳам йўқ”, деган.
Трампдан Шотландияга сафари чоғида Нетаньяху сўзлари ҳақидаги фикри сўралганда, у очликдан қийналаётган болаларнинг суратларини кўрганини ва Ғазода ҳақиқатдан очлик борлигини айтган. Шунингдек, Америка етакчиси вазиятни сохталаштириб бўлмаслигини таъкидлаган.
Оқ уй Трамп ва Нетаньяху ўртасида юз берган тортишув ҳақидаги хабарларга изоҳ бермаган. Бош вазирнинг идораси эса бундай тортишув ҳақидаги янгиликларни ёлғон деб атаган.
Изоҳ (0)