Шавкат Мирзиёев Восит Воҳидов номидаги Республика ихтисослаштирилган хирургия илмий-амалий тиббиёт маркази жамоасига миннатдорлик билдирди. Бу ҳақда президент матбуот котиби Шерзод Асадов хабар берди.
Қайд этилишича, Восит Воҳидов номидаги Республика ихтисослаштирилган хирургия илмий-амалий тиббиёт маркази ўзининг 50 йиллигини нишонланмоқда. Сана муносабати билан ташкил этилган тадбирда Шерзод Асадов президентнинг марказ жамоасига табригини ўқиб эшиттирди.
“Ўзбекистонда жарроҳлик бўйича етакчи ва нуфузли муассаса ҳисобланган ушбу марказ кўпмиллатли аҳил жамоасининг фидокорона меҳнати билан мамлакатимиз соғлиқни сақлаш тизимида алоҳида ўрин эгаллаб келаётганини барчамиз яхши биламиз ва юксак қадрлаймиз”, дейилади давлат раҳбарининг қутловида.
Сўнгги йилларда мазкур шифохонада 200 дан ортиқ янги жарроҳлик амалиёти жорий этилиб, энг мураккаб ва юқори технологик операциялар бажарилмоқда. Табрикда қайд этилганидек, оғир хасталиклардан азият чекаётган қанча-қанча юртдошлар кўп вақт ва маблағ эвазига хориждаги клиникаларга бориш азобидан қутулиб, Ўзбекистонда даво топмоқда.
Бундай натижаларга эришишда мамлакатда хирургия хизматини ислоҳ қилиш, ҳудудларда унинг сифатини ошириш ва кўламини кенгайтириш, марказ ва унинг филиаллари моддий-техник базаси ҳамда кадрлар салоҳиятини мустаҳкамлаш борасидаги ишлар муҳим омил бўлмоқда.
Президент марказнинг бутун жамоасига миннатдорлик билдириб, тилакларини изҳор этди. Шунингдек, тадбирда президент фармони билан мукофотланган марказ ходимларига фахрий унвон, орден ва медаллар топширилди.
Изоҳ (1)
Фарзандимни шу муассасада жаррохлик қилдирганмиз! Врачлар Абралов, Миразиз ака, Акмал ака в.б. лардан жуда мамнунмиз!