Жанубий Корея прокуратураси собиқ биринчи хонимни ҳибсга олишни талаб қилмоқда

Жанубий Корея прокуратураси собиқ биринчи хоним Ким Кон Хини ҳибсга олиш учун судга мурожаат қилди. Бу ҳақда Reuters хабар берди.

Таъкидланишича, прокурорлар бу ҳақда 7 август куни маълум қилган. Бунгача собиқ биринчи хоним коррупцияда айбланиб тергов қилинаётган эди. Айни пайтда, прокуратура ҳибс ордери билан боғлиқ батафсил маълумот бермаган. Кимнинг адвокатлари унга қўйилган айбловларни рад этмоқда.

Маълум қилинишича, Ким ва унинг турмуш ўртоғи собиқ президент Юн Сок Ёл бошқа-бошқа прокурорлар томонидан сўроқ қилинмоқда. Хусусан, президент Юн апрель ойида фавқулодда ҳолат эълон қилгани учун ҳибсда терговга олинган. Унинг рафиқаси эса акцияларнинг нархини манипуляция қилиш, пора олиш ва партия номзодларини танлаш жараёнига ноқонуний аралашишда гумон қилинмоқда. Матбуот вакиллари саволларига жавоб бермаган Ким, жамоатчиликда хавотир уйғотганидан афсусдалигини билдириб ўтган.

Эслатиб ўтамиз, 2024 йил 3 декабрь куни собиқ президент Юн тарафидан эълон қилинган ҳарбий ҳолат бир неча соат ичида тугатилган. 14 декабрь куни парламент уни импичмент қилиб, апрель ойида эса Конституциявий суд президентни расман лавозимидан четлатган эди.

Июнда бўлиб ўтган муддатдан олдинги президентлик сайловларида либерал номзод Ли Же Мёнг ғалаба қозонган. Шундан кейин, у Юннинг ҳарбий ҳолат жорий қилиши, унинг рафиқасига оид айбловлар ва 2023 йилги сув тошқини чоғида ҳалок бўлган денгиз пиёдаси ишини тергов қилишга буйруқ берган эди.