Интернетда Ўзбекистон фуқароларини ҳақоратлаган Югай Валерийга 3 йил 1 ой муддатга озодликдан маҳрум қилиш жазоси тайинланди. Бу ҳақда Олий суд матбуот хизмати хабар берди.
Ижтимоий тармоқларда “Абдуллоҳ” номи билан танилган, Тошкент вилоятида яшовчи 26 ёшли ушбу шахс 2024 йилнинг октябрь ноябрь ойларида Корея Республикасида бўлиб турган вақтида ўзининг ижтимоий тармоқлардаги оммавий саҳифалари орқали миллатлараро низо келтириб чиқариши мумкин бўлган, миллий қадриятни таҳқирловчи ҳамда диний эътиқодга кўра фуқароларни камситувчи сўзлар билан Ўзбекистон фуқароларига нисбатан қатор ҳақоратли чиқишлар қилиб борган.
У 24 март куни Абу Даби—Самарқанд рейси орқали Ўзбекистонга келтирилиб, ҳуқуқ-тартибот органлари ходимлари томонидан процессуал тартибда ушланган. Унга нисбатан қамоққа олиш тарзидаги эҳтиёт чораси қўлланганди.
“Мен Югай Валерий ижтимоий тармоқда халқимизни ҳақорат қилганман. Мен ҳаммасини актив учун қилгандим, танилишим учун қилгандим. Лекин бу нарсанинг ҳаммасини тушуниб етиб, жуда қаттиқ пушаймонман. Ҳаммадан чин қалбимдан кечирим сўрайман. Жуда қаттиқ пушаймонман. Илтимос, мени кечиринглар”, деган эди у қўлга олинганидан кейин.
Жиноят ишлари бўйича Нурафшон шаҳар судининг ҳукми билан у Жиноят кодексининг 156-моддаси (миллий, ирқий, этник ёки диний адоват қўзғатиш) 2-қисми ва 158-моддаси (Ўзбекистон президентига тажовуз қилиш) 3-қисмида назарда тутилган жиноятларни содир этганликда айбли деб топилиб, унга 3 йил 1 ой муддатга озодликдан маҳрум қилиш жазоси тайинланди.
Тайинланган жазони манзил колонияларда ўташ белгиланди.
Изоҳ (0)