Lib-Duxtegan ҳакерлар гуруҳи Эрон Миллий Танкер компанияси ва Эрон Кемачилик компаниясининг тизимларига бузиб кириши натижасида 39 та нефть танкери ва 25 та юк кемасининг иши издан чиқди. Бу ҳақда Sky News Аrabia нашри хабар бермоқда.
“Эроннинг 60 дан ортиқ нефть танкерлари ва юк кемаларининг тизимлари ишдан чиқарилди, бу эса мазкур кемалар, уларнинг портлари ва ташқи дунё ўртасидаги алоқаларнинг узилишига олиб келди. Бу Эрон денгиз секторига қаратилган энг йирик киберҳужумлардан бири бўлди”, дейилади ҳакерлар баёнотида.
Гуруҳнинг қўшимча қилишича, бузғунчилик Эроннинг телекоммуникация ва ахборот технологиялари соҳасида фаолият юритувчи “Фанава” ҳолдинги тармоғига кириб амалга оширилган. Ушбу холдинг сунъий йўлдош алоқаси, маълумотларни сақлаш ва тўлов тизимлари хизматларини кўрсатади.
Бундан аввал ТеlеМеssage хавфсиз корпоратив ёзишмалар хизматига рухсатсиз кирган ҳакер 60 га яқин америкалик амалдор, жумладан, АҚШ президентининг миллий хавфсизлик бўйича ёрдамчиси Майк Уолцнинг маълумотларини қўлга киритгани хабар қилинганди.
Изоҳ (0)