Жаҳон чемпионати саралаши доирасидаги БАА — Ўзбекистон учрашуви учун чипталар сотуви бошланди.
Бирлашган Араб Амирлигининг Абу-Даби шаҳрида ўтказиладиган беллашув учун чипталар Ticketmaster.ae сайти орқали сотилмоқда.
ОФК регламентига мувофиқ меҳмонлар учун стадион сиғимининг саккиз фоизига тенг сондаги чипталар тақдим этилади. Ўйин ўтказиладиган стадион сиғими 15 минг эканлигини ҳисобга олсак, ўзбекистонликлар учун тахминан 1200 та атрофида чипта ажратилади.
Муҳим эслатма: Расмий сайт — тиcкетмастер.аэъда қуйидагича огоҳлантириш бор:
“Виагого каби учинчи томон орқали онлайн харид қилинган чипталар ҳақиқий эмас. Бундай чипталар эгалари стадионга киритилмайди.”
Яъни ticketmaster.ae сайтидан бошқа платформаларда олинган чипталар билан стадионга кириш мумкин эмас. Шунингдек, ўзбекистонликлар ёки бошқа хориж фуқаролар бошқа секторлардан чипта харид қилса, стадионга кириш учун БАА резидент ID картаси керак бўлади.
Маълум бўлишича, стандарт секторлар учун чипта нархи 20 дирхамга (70 минг сўм атрофида – таҳририят.) баҳоланмоқда.
Темур Кападзе жамоаси 8-турдан кейин 17 очко билан А гуруҳида 2-ўринни эгаллаб турибди. “Оқ бўрилар”нинг асосий рақобатчиси бўлган амирликлар билан баҳс кўп нарсага аниқлик киритади. Яъни Ўзбекистон мазкур баҳсда дуранг натижа қайд этса ҳам мундиал йўлланмасига эга чиқди. БАА 13 очко билан 3-поғонани банд этган. Гуруҳ етакчи Эрон эса аллақачон Жаҳон чемпионати йўлланмасини қўлга киритган.
Маълумот учун, БАА — Ўзбекистон 5 июнь куни Абу-Дабидаги “Ал-Наҳян” стадионида бўлиб ўтади. Учрашув Тошкент вақти билан 21:00 да бошланади.
Аввалроқ ИИББ мазкур баҳс олдидан айрим туристик компаниялар “ўйин чиптаси кафолатланган” тур пакетлар таклиф этилаётгани сабаб мухлисларни огоҳликка чақирган эди.
Изоҳ (0)