Покистон бош вазири Шаҳбоз Шариф шанба куни телевидение орқали чиқиш қилиб, ўз халқини Ҳиндистон устидан қозонилган “ғалаба” билан табриклаб, Ҳиндистон билан музокара олиб боришга ва барча ҳал қилинмаган муаммоларни ҳал қилишга умид билдирди.
“Ҳарбийларимиз Ҳиндистоннинг тажовузкорлигига юқори профессионаллик билан жавоб қайтарди ва уни музокаралар столига ўтиришга мажбур қилди. Биз бу можарода ғалаба қозондик”, деган у.
Покистон бош вазири икки давлат ўртасидаги барча ҳал қилинмаган масалалар, жумладан, сув ресурсларини тақсимлаш ва Кашмир музокаралар йўли билан ҳал этилишига умид билдирган.
“Покистон қуролли кучлари ва самолётлари бир неча соат ичида ҳинд ҳарбийларининг овозини ўчирганини тарих доим ёдда тутади”, дея қўшимча қилган Шаҳбоз Шариф.
Маълумот ўрнида, Покистон ва Ҳиндистон ўртасидаги кескинлик 22 апрель куни кучайди. Сабаби бир гуруҳ террорчилар баҳсли Жамму ва Кашмир ҳудудида тинч аҳоли ва сайёҳларга қарата ўт очди. Ҳужум оқибатида 30 га яқин одам ҳалок бўлди. Ҳиндистон ҳужумни Покистон билан боғлади Покистон ҳукумати ҳужумчилар билан алоқаси борлигини қатъиян рад этган эди.
Шундан сўнг Ҳиндистон Покистонга қарши бир қанча кескин чоралар кўрган эди. Жумладан, қуруқликдаги Аттари назорат-ўтказиш пункти ёпилди. Покистонликларга мамлакатни тарк этиш топширилди. 1960 йилги Ҳинд дарёси сувларидан фойдаланиш бўйича битим дарҳол тўхтаганди.
Изоҳ (0)