Шавкат Мирзиёев 15 апрель куни Андижон вилоятига ташрифи давомида вилоятда 2025 йилда эришилиши режалаштирилган асосий мақсадларга оид тақдимот билан танишди.
Президент матбуот хизматининг хабар қилишича, 2025 йилнинг биринчи чорагида инвестиция лойиҳалари самарасида ҳамда тижорат банклари иштирокида 77 минг нафар фуқаро иш билан таъминланган.
Умуман, 2025 йилда 5 миллиард 700 миллион долларлик 166 та инвестиция лойиҳаси амалга оширилади. Бу орқали 31 мингта иш ўрни очилади. 31 турдаги янги маҳсулот олиш йўлга қўйилиб, 1,5 миллиард долларлик экспорт имконияти яратилади. Корхоналарни барқарор энергия билан таъминлаш учун 65 мегаватт янги қувватлар барпо этилади.
Бу ишларни давом эттириб, йил якунига қадар умумий 305 минг нафар аҳолини даромадли иш билан таъминлаш мақсад қилинган.
Тақдимотда иқтисодиётни диверсификация қилиш, саноатни ривожлантириш, янги технологияларни жорий этиш ва ишлаб чиқариш қувватларини кенгайтириш масалаларига алоҳида эътибор қаратилди. 2025 йилда иқтисодий ўсиш суръати 5,5 фоизга етиши кутилмоқда.
Президент мутасаддиларга лойиҳаларни ўз вақтида бажариб, аҳолини даромадли иш билан таъминлаш, ишсизларни касбга йўналтириш бўйича кўрсатмалар берди.
Шавкат Мирзиёев 2024 йилнинг ноябрида Андижон вилоятини ижтимоий-иқтисодий ривожлантириш, инвестиция ва тадбиркорлик муҳитини янада яхшилаш чора-тадбирлари юзасидан йиғилиш ўтказганида, вилоятда 400 минг аҳолини камбағалликдан олиб чиқиш зарурлигини айтганди.
Вилоятда ишсизлик 9,1 фоиздан 7 фоизга тушгани, аҳолининг тадбиркорликдан олаётган даромади 1,5 бараварга ошгани қайд этилганди. Президент бу кўрсаткичлар ҳали етарли эмаслигини таъкидлаганди.
Шавкат Мирзиёевнинг Андижон вилоятига ташрифи
Шавкат Мирзиёев ҳудудлар ривожи, аҳоли ҳаёти билан яқиндан танишиш мақсадида 15 апрель куни Андижон вилоятига келди. Давлат раҳбари дастлаб Андижон халқаро аэропортини модернизациялаш ишларининг бориши билан танишди. WBM Romitex кластерининг Андижон шаҳрида қурилган янги корхонасига бориб, фаолиятини кўздан кечирди. Ташриф давомида янги корхоналар фаолиятидан ташқари, саноат, энергетика, шаҳарсозлик ва бошқа соҳаларда амалга оширилаётган ишлар билан танишиш, жойлардаги қурилиш ва бунёдкорликни кўздан кечириш ҳам режалаштирилган.
Шунингдек, давлат раҳбари ҳудудни комплекс ривожлантириш бўйича йиғилиш ўтказади.
Изоҳ (0)