Мудофаа вазирлигига Бўстонлиқ туманидаги 500 гектар ер майдони ажратиб берилди. Бу ҳақда Тошкент вилояти ҳокими Зоир Мирзаев тегишли қарорни имзолади.
Қайд этилишича, 10354, 10363-контурда жойлашган давлат захирасидаги ер майдони туманнинг “Нанай” МФЙ ҳудудида жойлашган.
Ажратилган мазкур ер майдонида “Мудофаа вазирлиги боғи” барпо этилиши белгиланган. Мудофаа вазирлигига ажратилган ер майдонини Вазирлар Маҳкамасининг 2024 йил 13 апрелдаги фармойиши билан белгиланган мақсадларда фойдаланиш вазифаси юклатилган.
Давлат кадастрлари палатаси Тошкент вилояти бошқармаси ушбу қарорга мувофиқ белгиланган тартибда кадастр ҳужжатларини расмийлаштиради ҳамда ер майдонини давлат рўйхатидан ўтказади.
Февраль бошларида Ўзбекистонда ўрмон фонди ерлари сўнгги олти йилда 1 миллион гектарга кенгайиши тўғрисида хабар берилганди. Март ойида эса Макроиқтисодий ва ҳудудий тадқиқотлар институти (МҲТИ) мутахассислари 2018—2022 йилларда республика бўйича умумий экин майдонлари 3 миллион 396 минг гектардан 3 миллион 353,3 минг гектарга ёки 1,3 фоизга қисқарганини маълум қилган эди.
Изоҳ (0)