O‘zbekistonda qaysi viloyatlarda ekin maydonidan olinadigan daromad eng ko‘p oshgani maʼlum qilindi

Makroiqtisodiy va hududiy tadqiqotlar instituti (MHTI) mutaxassislari qishloq xo‘jaligida yer resurslaridan foydalanish samaradorligini baholadi.

Maʼlum qilinishicha, 2018—2022-yillarda respublika bo‘yicha umumiy ekin maydonlari 3 million 396 ming gektardan 3 million 353,3 ming gektarga yoki 1,3 foizga qisqargan.

Bu davrda ko‘p yillik dov-daraxtlar maydonlari 432,5 ming gektardan 488,6 ming gektarga yoki 13 foizga oshgan. Bug‘doy va paxta ekin maydonlarini bosqichma-bosqich qisqartirish asosiy maqsadlardan biri sifatida belgilab olindi. 2018—2022-yillarda umumiy ekin maydonlarida bug‘doy va paxta maydonlarining ulushi 73,5 foizdan 69,5 foizga yoki 3,9 foiz punktiga qisqardi.

Shuningdek, paxtachilik va g‘allachilik sohasida amalga oshirilayotgan islohotlar ushbu ekinlar hosildorligini sezilarli darajada oshirish imkonini bergan. 2018—2022-yillarda respublika bo‘yicha paxta hosildorligi gektariga o‘rtacha 21 sentnerdan 34,1 sentnerga yoki 62,4 foizga, bug‘doy hosildorligi 41 sentnerdan 47,2 sentnerga yoki 15,1 foizga oshdi.

2018—2022-yillarda butun respublika bo‘yicha 1 gektar ekin maydonidan olinadigan o‘rtacha daromad 42 million so‘mdan 46,5 million so‘mga ko‘tarildi. Shu davrda 1 gektar yerdan olinadigan o‘rtacha daromad Farg‘ona (24,5 foiz), Namangan (20,2 foiz), Qashqadaryo (17,8 foiz), Sirdaryo (17,3 foiz) va Surxondaryo (15,8 foiz) viloyatlarida eng ko‘p oshdi.

“O‘zbekiston-2030” strategiyasida bir gektar yerdan olinadigan o‘rtacha daromadni 5 ming dollarga yetkazish belgilangan. Bu maqsadga erishish uchun gektaridan olinadigan o‘rtacha daromadni 2022-yildagiga nisbatan 18,9 foizga oshirish zarur (2022-yilda 4 205 AQSH dollarni tashkil etgandi).