Халқаро жиноий суд прокурори Карим Хон Исроил бош вазири Биньямин Нетаньяхуни инсониятга қарши жиноятлари ортидан ҳибсга олиш учун ордер талаб қилди. Бу ҳақда Халқаро жиноий суд расмий манбасига таяниб, CNN нашри хабар берди.
Манбада айтилишича, Карим Хон Исроил раҳбари Ғазодаги воқеалар учун жавоб бериши кераклигини маълум қилган. Жиноий судни Нетаньяхуни ҳибсга олиш учун ордер беришга чақирган.
Талабномада Нетаньяху билан биргаликда Исроил мудофаа вазири Йоав Галлантни ҳам ҳибсга олиш сўралган. Исроил раҳбариятининг икки вакилига гуманитар ҳалокат шароитида яшаётган Ғазо аҳолисига нисбатан ҳарбий жиноятлар содир этиш ва кўплаб фуқаролар қурбон бўлишига сабабчи бўлиш айбловлари қўйилган.
Прокурор Карим Хон, шунингдек, ҲАМАС раҳбариятининг уч вакилига нисбатан ҳам ҳибсга олиш ордери берилишини талаб қилган. Улар орасида ҲАМАС бошқарувининг Ғазодаги раҳбари Яҳё Синвар, ҲАМАС ҳарбий қаноти бўлган “Ал-Қассам” бригадалари бош қўмондони Муҳаммад Диаб Иброҳим Ал-Масрий ва ташкилот сиёсий бюроси раҳбари Исмоил Ҳания борлиги қайд этилган.
Ҳибсга олиш ордери берилиши талаб қилинган ушбу талабнома илк бор Исроил олий раҳбарияти вакилларини нишонга олган. Агар ушбу талабнома аризаси маъқулланса, Исроил етакчиларига нисбатан ҳибсга олиш эҳтиёт чораси расман қўлланишига олиб келади.
Маълумот ўрнида, Халқаро жиноий суд томонидан ҳибсга олиш ордери олдинроқ Россия президенти Владимир Путинга нисбатан эълон қилинган. Россия раҳбарини суверен Украинага бостириб кириш, тинч аҳоли ўлимига сабабчи бўлиш ҳамда Украинанинг Буча шаҳрида оммавий қирғинга йўл қўйишда айблаб, ҳибсга олиш буйруғи чиқарилган.
Манбага кўра, ҳибсга олиниши сўралган ҲАМАС вакиллари қирғин уюштириш, қотиллик, гаровга олиш ва жинсий зўравонликда ҳам айбланган. Ушбу айбловлар асосан 7 октябрдаги ҲАМАС ҳужуми оқибатларига қаратилган.
Суд прокурорнинг аризасини кўриб чиқиши маълум қилинган.
Изоҳ (0)