Қашқадарёнинг Кўкдала туманида 2-синф ўқувчиси юк машинаси уриб кетишидан ҳалок бўлди.
Ижтимоий тармоқларда бир гуруҳ ўқувчилар пиёдалар ўтиш жойидан ўтаётганида “КамАЗ” улардан бирини уриб юборгани акс этган видео тарқалганди.
Аниқланишича, воқеа 15 май куни вилоятнинг Кўкдала туманида юз берган. Йўлдан ўтаётган болалар 2-синф ўқувчилари бўлиб, юк машина уриб юборган бола воқеа жойида вафот этган.
Вилоят ИИБ матбуот хизматининг билдиришича, ЙТҲ юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) билан жиноят иши қўзғатилган ва ҳайдовчига нисбатан қамоққа олиш тарзидаги эҳтиёт чораси қўлланган.
Маълумот учун, Жиноят кодексининг 266-моддаси 2-қисмидаги қилмиш учун муайян ҳуқуқдан маҳрум қилиб, 7 йилгача озодликдан маҳрум қилиш жазоси белгиланган.
Изоҳ (0)