Австралия ҳукумати 16 ёшдан кичик фойдаланувчиларга YouTube’да аккаунт очиш тақиқини жорий қилмоқда. Бу ҳақда Arab News хабар берди.
Таъкидланишича, коммуникациялар вазири Аника Уэллс 30 июль куни ёш чегарасини белгилаши керак бўлган ижтимоий тармоқлар рўйхатини эълон қилган. Унга кўра, 10 декабрдан бошлаб барча платформаларда ёш чегараси ўрнатилмаса, уларга 50 миллион Австралия долларгача жарима солинади.
Австралия парламенти 2024 йил ноябрида Facebook, Instagram, Snapchat, TikTok ва Х каби платформаларда 16 ёшгача бўлган болаларнинг аккаунт очишини тақиқловчи қонунни қабул қилган эди. Аммо бу рўйхатда шу пайтгача YouTube мавжуд бўлмаган.
Уэллс YouTube’га тақиқ жорий этилишини изоҳлаб, платформанинг АҚШдаги эгаси Alphabet Инc. Австралияни судга беришидан қўрқмаслигини билдирган.
“Австралиялик болаларнинг 40 фоизи YouTube’дан зарар кўрган. Биз болаларимиз фаровонлиги учун курашда таҳдидлардан қўрқмаймиз”, деган Уэллс.
Янги қўлланилаётган чораларга кўра, эндиликда болалар YouTube видеоларини томоша қила олади, аммо ўзларининг номидан ҳисоб яратиши тақиқланади. Бу ҳолат юзасидан платформа расмий баёнот берган. Унда айтилишича, “YouTube ижтимоий тармоқ эмас, балки бепул сифатли видеолар кутубхонаси”. Компания, шунингдек, кейинги қадамларини кўриб чиқишини маълум қилган.
Австралия бош вазири Энтони Альбанесе болаларни ижтимоий тармоқлардан ҳимоя қилиш учун халқаро ҳамжамият билан бирга ҳаракат қилишини билдирган.
“Бошқа давлат раҳбарлари билан мулоқотларимда шунга гувоҳ бўлдимки, улар ҳам болаларга ижтимоий тармоқлар салбий таъсир этишидан хавотирда. Бу фақат Австралияга хос эмас, балки глобал муаммо,” деган Альбанесе.
Уэллс ижтимоий тармоқларни ёшни аниқловчи альтернатив усуллардан фойдаланишга чақириб, шундай деди:
“Ёшни аниқлаш учун бошқа альтернатив усуллардан фойдаланинг. Масалан, платформалар фойдаланувчилар ҳақида аниқ-тиниқ маълумотларга эга, масалан, уларнинг кимлиги, қачон аккаунт очгани ва ҳоказо”.
Онлайн ўйинлар, хабар алмашиш, таълим ва соғлиқни сақлаш иловалари эса ёш чегарасидан мустасно қилиниши қўшимча қилинган. Ҳукуматга кўра, бу чеклов ёшларнинг зарарли одатлар, ижтимоий изоляция, уйқу бузилиши, руҳий ва жисмоний соғлиқ муаммолари ҳамда ноўрин контентдан ҳимоя қилишга қаратилган.
Изоҳ (0)