Ҳиндистоннинг Карнаката штатида яшовчи 38 ёшли аёлда ҳеч кимда учрамайдиган қон гуруҳи аниқланди. Бу ҳақда The New Indian Express хабар берди.
Янгилик аёлни операцияга тайёрлаш жараёнида қайд этилган. Беморнинг қони кенг тарқалган О Rh+ сифатида белгиланган. Бироқ мавжуд донор намуналари орасида бирортаси ҳам қон қуйишга мос келмаган.
Замонавий серологик усуллардан фойдаланиб, жамоамиз унинг қони барча тест намуналари билан мос келмайдиган ъпанреактивъ эканини аниқлади. Буни кам учрайдиган ёки номаълум қон гуруҳининг эҳтимолий ҳолати деб ҳисоблаб, мос келадиганини топиш учун беморнинг 20 нафар оила аъзосидан қон намуналарини олдик, аммо уларнинг ҳеч бири мос келмади, деди Колар клиникаси жарроҳи Анкит Матур.
Таъкидланишича, операция муваффақиятли ўтказилган ва қон қуйишга зарурат туғилмаган. Шифохона беморнинг қон намуналарини Бристолдаги (Буюк Британия) Халқаро қон гуруҳлари референс лабораторияси (IBGRL) ва Бангалордаги қон марказига юборган.
Олимлар 10 ой давомида молекуляр тадқиқотлар ўтказиб, илгари номаълум бўлган CRIB номли қон гуруҳи антигенининг кашф этилганини тасдиқлаган. Бу кашфиёт 2025 йил июнь ойида Миланда (Италия) бўлиб ўтган Халқаро қон қуйиш жамиятининг (ICBT) 35-минтақавий конгрессида тақдим этилган.
Ҳиндистонда ноёб қон гуруҳларига эга ихтиёрий донорлар реестри ташкил этилган. Келажакда CRIB гуруҳи аниқланган бошқа беморлар бўлса, улар ушбу рўйхатга киритилади. Баъзи иммунологлар номаълум бўлган қон гуруҳининг пайдо бўлишига Ҳиндистонда сақланиб қолган яқин қариндошлар ўртасидаги никоҳ сабаб бўлиши мумкин деб ҳисобламоқда.
Изоҳ (0)